جاڭاوزەن ماڭىنداعى مۇناي ۇڭعىماسىندا مەتان ءبولىندى

جاڭاوزەن قالاسىنىڭ ىرگەسىندەگى تەڭگە اۋىلىنان 500 مەتر جەردە مەتان بولىنەتىن مۇناي ۇڭعىماسىندا اپات بولدى. بۇل تۋرالى ماڭعىستاۋ وبلىسىنىڭ ەكولوگيا دەپارتامەنتى مالىمدەدى, دەپ حابارلايدى Qandastar.kz اقپارات پورتالى.

10 ماۋسىمدا الەۋمەتتىك جەلىلەردە جاڭاوزەن قالاسىنان 500 مەتر قاشىقتىقتا ورنالاسقان تەڭگە اۋىلى ماڭىنداعى مۇناي ۇڭعىماسىندا اتموسفەراعا شىعارىندىلار تۇسىرىلگەن ۆيدەو تاراعان بولاتىن.

رەسمي مالىمەت بويىنشا, وقيعا تاڭعى ساعات 08:30 شاماسىندا «پەترو نەفتەگازسەرۆيس» جشس-نە قاراستى No553 ۇڭعىمانى بۇرعىلاۋ كەزىندە بولعان. نەبارى ون مينۋتتان كەيىن, ساعات 08:40-تا كومپانيا قىزمەتكەرلەرى شۇعىل جۇمىسقا كىرىسىپ, توتەنشە جاعدايدى انىقتادى.

وقيعا ورنىنا ماڭعىستاۋ وبلىسى بويىنشا ەكولوگيا دەپارتامەنتىنىڭ زەرتحانالىق-اناليتيكالىق باقىلاۋ ءبولىمىنىڭ ماماندارى شىقتى. ولار اتموسفەرالىق اۋانىڭ كۇيىنە اسپاپتىق ولشەۋلەر جۇرگىزدى. سىناقتاردىڭ ناتيجەلەرى مەن قابىلدانعان شارالار تۋرالى قوسىمشا حابارلانادى, — دەپ جازىلعان مالىمەتتە.