Jańaózen mańyndaǵy munaı uńǵymasynda metan bólindi

Jańaózen qalasynyń irgesindegi Teńge aýylynan 500 metr jerde metan bólinetin munaı uńǵymasynda apat boldy. Bul týraly Mańǵystaý oblysynyń ekologııa departamenti málimdedi, dep habarlaıdy Qandastar.kz aqparat portaly.

10 maýsymda áleýmettik jelilerde Jańaózen qalasynan 500 metr qashyqtyqta ornalasqan Teńge aýyly mańyndaǵy munaı uńǵymasynda atmosferaǵa shyǵaryndylar túsirilgen vıdeo taraǵan bolatyn.

Resmı málimet boıynsha, oqıǵa tańǵy saǵat 08:30 shamasynda «Petro Neftegazservıs» JShS-ne qarasty No553 uńǵymany burǵylaý kezinde bolǵan. Nebári on mınýttan keıin, saǵat 08:40-ta kompanııa qyzmetkerleri shuǵyl jumysqa kirisip, tótenshe jaǵdaıdy anyqtady.

Oqıǵa ornyna Mańǵystaý oblysy boıynsha ekologııa departamentiniń zerthanalyq-analıtıkalyq baqylaý bóliminiń mamandary shyqty. Olar atmosferalyq aýanyń kúıine aspaptyq ólsheýler júrgizdi. Synaqtardyń nátıjeleri men qabyldanǵan sharalar týraly qosymsha habarlanady, — dep jazylǵan málimette.