جاڭاوزەندىك فۋتبولشىلار ەۋروپا چەمپيوناتىندا ەل نامىسىن قورعايدى

4-8 ماۋسىم ارالىعىندا مولدوۆا استاناسى كيشينەۆتە فۋتبولدان اۋەسقويلار اراسىندا SOCCA 2025 ەۋروپا چەمپيوناتى وتەدى. بۇل بايراقتى باسەكەدە ەلنامىسىن قورعاۋعا اتتانعان ۇلتتىق قۇرامانىڭ قاتارىندا جاڭاوزەن قالاسىنان ىرىكتەلگەن 10 فۋتبولشى باق سىنايدى, دەپ حابارلايدى Qandastar.kz اقپارات پورتالى.

جاڭاوزەن قالاسى اكىمىنىڭ ءباسپاسوز قىزمەتى ۇسىنعان مالىمەتكە سەنسەك, SOCCA چەمپيوناتى – الەمنىڭ ءتۇرلى ەلدەرىنەن جينالعان اۋەسقوي فۋتبولشىلار قاتىساتىن بەدەلدى سپورتتىق ءىس-شارالاردىڭ ءبىرى. چەمپيونات اياسىنداعى قازاقستان قۇراماسىنىڭ ويىندارى Qazsport تەلەارناسىنان تىكەلەي ەفيردە كورسەتىلەدى دەپ جوسپارلانۋدا.

«ماڭعىستاۋ وڭىرىنەن شىققان سپورتشىلاردىڭ حالىقارالىق دەڭگەيدەگى سايىستارعا قاتىسىپ, ەلىمىزدىڭ نامىسىن قورعاۋى – ءوڭىر سپورتىنداعى وڭ وزگەرىستەردىڭ ايقىن كورىنىسى.

جاڭاوزەندىك فۋتبولشىلار ءۇشىن بۇل چەمپيونات – كاسىبي شىڭدالۋعا, تاجىريبە جيناقتاۋعا جانە ەل ابىرويىن ارتتىرۋعا ۇلكەن مۇمكىندىك. جەرلەستەرىمىزدىڭ سەنىم ۇدەسىنەن شىعىپ, جوعارى ناتيجە كورسەتەتىنىنە سەنىم بىلدىرەمىز»,  – دەلىنگەن حابارلامادا.