جاڭالىقتار
جاناربەك ءاشىمجان: الاتاۋ قالاسى قۇرىلعانىنا 1,5 جىل وتسە دە, جوبالىق-سمەتالىق قۇجات دايىن ەمەس
فوتو: اشىق دەرەككوز
ماجىلىستەگى «AMANAT» پارتياسى فراكتسياسىنىڭ مۇشەسى, دەپۋتات جاناربەك ءاشىمجان الاتاۋ قالاسىنا قاتىستى وزەكتى ماسەلەلەردى كوتەرىپ, پرەمەر-مينيستر ولجاس بەكتەنوۆكە ساۋال جولدادى, دەپ حابارلايدى qandastar.kz
دەپۋتاتتىڭ ايتۋىنشا, مەملەكەت باسشىسى قاسىم-جومارت توقاەۆتىڭ تاپسىرماسىمەن قۇرىلعان الاتاۋ قالاسى – ستراتەگيالىق ماڭىزى زور جوبا.
«بۇل قالا قازاقستاننىڭ كەلەشەكتەگى كەلبەتىن تانىتپاق. وندا تەحنولوگيالىق ورلەۋگە جانە ءومىر سۇرۋگە بارىنشا قولايلى جاعداي ۇيلەسىم تابۋى قاجەت», – دەپ پرەزيدەنت ءسوزىن مىسالعا كەلتىردى دەپۋتات.
وسى تۇستا جاناربەك ءاشىمجان قالا قۇرىلىسى جۇمىستارىن جەدەلدەتۋ قاجەتتىگىن اتاپ ءوتتى.
«قالانىڭ قۇرىلعانىنا 1,5 جىل وتسە دە, كوپتەگەن جوبالاردىڭ جوبالىق-سمەتالىق قۇجاتتامالارى كەشىگۋدە. ونىڭ ىشىندە, زارەچنىي مەن جەتىگەن ەلدى مەكەندەرىندەگى اسا ءزارۋ مادەنيەت ۇيلەرى, سپورت كەشەنى مەن اۋىزسۋ جۇيەلەرىنە قاتىستى جوبالاردى تەز ارادا جەرگىلىكتى اكىمدىك دايىنداۋى ءتيىس. قالانىڭ قاجەتتىلىگى ءۇشىن قايتارىلعان جەر تەلىمدەرىنە قاتىستى شەشىمىن تاپپاعان ماسەلەلەر بار», – دەدى دەپۋتات.
aikyn.kz جازعانداي, ول باس جوسپارعا سايكەس, الاتاۋ قالاسىندا 168 مەكتەپ, 219 بالاباقشا, 102 مەديتسينالىق مەكەمە سالىنۋى كەرەكتىگىن اتاپ ءوتتى. بۇل ايماقتاعى جوعارى دەموگرافيالىق ءوسىم مەن الەۋمەتتىك ينفراقۇرىلىم قاجەتتىلىگىنەن تۋىنداپ وتىر.
دەپۋتات پرەزيدەنت ءوز جولداۋىندا Alatau City جوباسىن جۇزەگە اسىرۋ بويىنشا الەمدىك شەنچجەن جاھاندىق تەحنوپوليسىن سالۋعا قاتىسقان ءىرى كومپانيالارمەن كەلىسىمگە كەلگەنى جونىندە ايتقان ءسوزىن ەسكە سالىپ ءوتتى. سوندىقتان ورتالىق مەملەكەتتىك ورگاندار تاراپىنان جوبانى ىسكە اسىرۋعا ينستيتۋتسيونالدىق قولداۋ كورسەتىلىپ, ينۆەستورلار ءۇشىن تولىققاندى جاعداي جاسالۋى قاجەت.
«الاتاۋ قالاسى قازاقستاننىڭ كەلەشەكتەگى زاماناۋي كەلبەتىن تانىتاتىن, تەحنولوگيالىق ورلەۋگە جانە ءومىر سۇرۋگە بارىنشا قولايلى جاعدايى جاسالعان الەمدىك دەڭگەيدەگى تەحنوپوليس بولۋى ءتيىس. بۇل – پرەزيدەنتىمىزدىڭ ىرگەلى باستاماسى», – دەدى حالىق قالاۋلىسى.
