«جانازا كۇنى تۇرمەدەن حابارلاستى»: تالعاردا قازا تاپقان ءجاسوسپىرىمنىڭ اكەسى «حۋتور جىگىتتەرى» قالاي قورقىتقانىن ايتتى

فوتو: ۆيدەو سكرينشوت

بالاڭنىن جانىنان كور قازىپ دايىنداپ قويساڭ بولادى, تىنىش جۇرمەيتىن بولساڭ.

الماتى وبلىسى تالعار قالاسىندا ءبىر توپ بۇزاقىنىڭ قولىنان ولگەن 16 جاسار جاسوسپىرىمگە قاتىستى الەۋمەتتىك جەلىلەردە ءتۇرلى اقپاراتتار تاراپ جاتىر. جەلىدەگى اقپاراتقا سۇيەنسەك, شەرزات بولاتتىڭ قازاسىنا «حۋتور بانداسىنىڭ» وكىلدەرى كىنالى. سونداي-اق اتالعان قىلمىستىق توپقا اۋدان اكىمدىگىنىڭ اپپارات باسشىسى اسلان قاسىمباەۆتىڭ قاتىسى بار دەگەن مالىمەت پايدا بولدى. ناقتىراق ايتساق, جەلىدە قاسىمباەۆتىڭ «حۋتورلىق حاسان» دەگەن اتپەن تانىمال قىلمىستىق تۇلعانىڭ تۋعان باۋىرى ەكەنى جازىلىپ جاتىر, دەپ حابارلايدى qandastar.kz Skifews.kz اقپارات پورتالى

KursivMedia سايتىنىڭ مالىمەتىنشە, وسى اقپاراتقا تالعار اۋدانى اكىمىنىڭ ورىنباسارى ايبەك بيداەۆ جاۋاپ بەردى. بيداەۆ اسلان قاسىمباەۆتىڭ حاسانعا تۋىستىق قاتىناسىن راستاعان جوق, جوققا دا شىعارمادى.

«الەۋمەتتىك جەلىدە جازىلىپ جاتىر عوي, حاسان اكىم اپپاراتى باسشىسىنىڭ باۋىرى دەپ. باۋىرى بولسا, باۋىرى شىعار. بىراق بۇل وقيعامەن ارى قاراي اينالىسىپ جاتقان قۇقىق قورعاۋ ورگاندارى بار عوي. سوندىقتان سۇراقتاردى سول كىسىلەرگە قويۋ كەرەك شىعار», – دەدى ايبەك بيداەۆ.

ونىڭ ايتۋىنشا, اسلان قاسىمباەۆتىڭ تالعار اۋدانى اكىمى اپپاراتىنىڭ باسشىسى بولىپ وتىرعانىنا ەكى جىلدان اسقان. وعان دەيىن تالعار اۋدانىنىڭ بەلبۇلاق اۋىلدىق وكرۋگىنىڭ اكىمى بولىپ جۇمىس ىستەگەن. بۇل اقپارات تالعار اۋدانى اكىمشىلىگىنىڭ رەسمي سايتىندا دا جازىلعان. ايبەك بيداەۆ مەملەكەتتىك قىزمەتكە تۇرماس بۇرىن ءاربىر ادام ارنايى تەكسەرۋدەن وتەتىنىن ايتتى.

«ۇلتتىق قاۋىپسىزدىك كوميتەتىنەن ءوتىپ بارىپ, تەك قانا مەملەكەتتىك قىزمەتكە كەلەدى. مەملەكەتكە تەكسەرۋدەن وتپەگەن ادام مەملەكەتتىك قىزمەتكە كەلمەيدى. قازىر اۋداندا وسى ءىس بويىنشا كوميسسيا قۇرىلدى, شتاب قۇرىلدى. ءىىم ءبىرىنشى ورىنباسارى اۋدانعا كەلىپ, وسى شتابقا توراعالىق ەتىپ وتىر. بۇل سۇراقتاردى سول كىسىلەرگە قويساڭىز. اسلان قاسىمباەۆ وتكەن جۇما كۇنى دەنساۋلىعىنا بايلانىستى ۋاقىتشا دەمالىسقا كەتكەن, ەرتەڭ جۇمىسقا شىعادى», – دەدى بيداەۆ.

مارقۇمنىڭ اكەسىنىڭ سوزىنشە, اۋداندىق ىشكى ىستەر باسقارماسىندا 70-80% “حۋتور” دەگەن اۋىلدىڭ جىگىتتەرى جۇمىس ىستەيدى.

“ول جىگىتتەردىڭ دە تۋىستارى ميليتسيا. ناقتى ەشكىمگە جالا جاپپايمىن. بىراق ۇلىما كەلگەن ۇلكەن جىگىت تە ميليتسيادا جۇمىس ىستەيدى ەكەن. جەتى ادام ۇستالىپ, تورتەۋى ۇستالماي تۇرعانى دا سول سەبەپتى. ال ەكى ايەل كۋاگەر رەتىندە جۇرەدى دەيدى. مەنىڭ وعان كوڭىلىم تولمايدى. ەكەۋى ولاردى ساتپاۋ ءۇشىن اقشا الىپ وتىر ما, قورقىپ وتىر ما, تۇسىنبەدىم. بىرەۋلەر حاساننىڭ جىگىتتەرى دەيدى. ال مەن حاساننىڭ كىم ەكەنىن بىلمەيمىن. ەستۋىمشە تالعارعا قارايدى, باندانى رەتتەيدى, بىرەۋلەرگە اقشا بەرەدى. ونىڭ اكىمدىكتە ىستەيتىن اعاسى دا بار ەكەن دەيدى. قالاداعى دۇكەن, مەيرامحانالاردىڭ ءبارى ولارعا تابىسىنىڭ ءبىر بولىگىن بەرىپ وتىرادى ەكەن عوي. ولار مەنىڭ جەدەل جاردەمدە ىستەيتىنىمدى دە ءبىلىپ الىپتى”, – دەيدى مارقۇمنىڭ اكەسى.

قارجاۋباي نۇرىموۆتىڭ ايتۋىنشا, تالعاردا “رەكەت” سياقتى قىلمىستىق توپ بار. ولاردى قۇرعان اكىمدىك دەيدى.

“باسىندا ماعان “كەلىپ, اقشا سۇرايدى, سۇراعانىن بەر” دەپ ايتقان. مەن, “جارايدى كەلسە بەرەمىن” دەگەنمىن. تالعاردا “رەكەت” سياقتىلار بار. تالعاردا ءبارىن قۇرعان “اكىمدىك, حالىققا قىزمەت كورسەتۋ ورتالىعى, پروكۋراتۋرا, اۋداندىق ىشكى ىستەر باسقارماسى”. بۇل جەردە ەشقانداي ادىلدىك الا المايمىز, الىنبايدى دا. تالعارداعى پوليتسيا جەمقورلىققا ابدەن بەيىمدەلىپ العان. جىلدا “حۋتوردىڭ” وكىلدەرى ادام ولتىرەدى. ءجابىر كورگەندەردىڭ جاقىندارى ۇيگە كەلىپ ايتىپ جاتىر. بىرەۋلەردىڭ تال تۇستە كوزىن ويىپ العان, بىرەۋىن اتقان, ءبىراز قىزداردى زورلاعان. بالا كەزدەن بىلەمىز, “حۋتوردان” ءبارى قورقادى”. سەبەبى ولار شاكال سياقتى, پىشاق سۇعادى, اتادى, ارتىندا ەشقانداي جازالاۋ بولماعان سوڭ ەمىن-ەركىن جۇرە بەرەدى. ءبارىن اقشامەن شەشەدى”, – دەيدى مارقۇمنىڭ اكەسى.

مارقۇمنىڭ اكەسىنىڭ سوزىنشە, جانازا بولعان كۇنى “حۋتور بانداسىنىڭ” ادامدارى كەلىپ, قورقىتىپ كەتكەن. “ ۇلىڭنىڭ جانىنان كورىڭدى قازا بەر دەپ ايتتى” دەيدى.

“جانازا بولىپ جاتقان كەزدە ماعان بىرەۋ “زاڭگەردىڭ كومەكشىسىمىن, سىزبەن سويلەسەمىن دەپ جاتىر” دەدى دە, تەلەفونىن بەردى. السام, “تۇرمەدەن ەركوشپىن, جىگىتتەردىڭ اعاسىمىن. تىنىش ءجۇر” دەدى. مەن “سوڭىنا دەيىن بارامىن. تۇرمەدە بولساڭ ارى قاراي وتىرا بەر” دەدىم. جانازاعا كەلگەن جىگىتتەر كوڭىل ايتقان بولىپ, سويلەسەمىز دەپ بەيىتكە الىپ كەتتى. سويتسەم ولار “حۋتوردىڭ” جىگىتتەرى ەكەن. بەيىتتى كورسەتىپ, “بالاڭنىن جانىنان كور قازىپ دايىنداپ قويساڭ بولادى, تىنىش جۇرمەيتىن بولساڭ” دەپ ەسكەرتىپ كەتتى. ولارعا قان توگىلگەنىن قالامايمىن, ادىلەتتى شەشىممەن سوڭىنا دەيىن بارامىن دەپ ايتتىم”, – دەدى مارقۇمنىڭ اكەسى.