“Janazaǵa barmaǵan”. Ánshiniń toıynda bata bergen Bas múftı synǵa ushyrady

QMDB tóraǵasy, Bas múftı Naýryzbaı qajy Taǵanuly el ishinde synnyń astynda qaldy, dep habarlaıdy Qandastar.kz aqparat portaly.

Jelide onyń Astanadan arnaıy baryp, ánshi Sáken Maıǵazıevtiń ulynyń toıynda bata bergen beıneleri tarap jatyr.

Qoǵam belsendileri men jýrnalıster Bas múftıdiń halyqtyq tragedııalar kezinde kózge túspeıtinin atap ótýde. Alaıda juldyzdardyń qýanyshyna ýaqyt taýyp keletinin synǵa aldy. Jýrnalıst Dıas Nuraqyn áleýmettik jelide jazba jarııalaǵan.

«BQO-da bes bala órtenip ólgende janazalaryna barmaǵan, Aqtaýda ushaq apatqa ushyraǵanda quran baǵyshtamaǵan, Astanada avtobýs apatynan shynashaqtaı qyz eki aıaǵynan aıyrylǵanda júregi syzdamaǵan Bas múftı búgin Sáken Maıǵazıevtiń ulynyń toıynda bata berip júr. Toı degende qý bas domalaıdy degen ras-aý?!» — dep pikir qaldyrdy.

Ol qoǵam qaıratkerleri men din ókilderiniń eldegi qıyn sátterde birinshi bolyp ún qatýy tıis ekenin eske saldy.

Aıta keteıik, ánshi Sáken Maıǵazıevtiń uly úılenip, saltanatty rásimdi bastan-aıaq onlaın kórý úshin 1380 tg tóleý kerektigi aıtylǵan.