جانىبەك ءالىمحان ۇلى مەن كارلوس ادامەستىڭ جەكپە-جەگى وتپەيتىن بولدى

الەمدىك بوكس يندۋسترياسىنىڭ ەڭ ىقپالدى تۇلعالارىنىڭ ءبىرى, ساۋد ارابياسىنىڭ بەدەلدى ينۆەستورى تۋركي ءال اش-شەيح جانىبەك ءالىمحان ۇلى مەن كارلوس ادامەس اراسىنداعى تيتۋلدىق جەكپە-جەكتى ۇيىمداستىرۋعا نيەت بىلدىرگەنىن مالىمدەدى, دەپ جازدى Qandastar.kz.

الايدا ونىڭ ايتۋىنشا, بۇل جەكپە-جەك ادامەستىڭ كەلىسپەۋىنەن جۇزەگە اسپاي قالعان.

«مەن سىزدەرگە ءبىر شىندىقتى ايتايىن. ول (ادامەس) مەنىڭ ۋاقىتىمدى تەككە كەتىردى جانە ءوز مۇمكىندىگىن جىبەرىپ الدى. مەن وعان وتە جاقسى, جومارت ۇسىنىس جاسادىم. الايدا 4-5 كۇن بويى مۇلدە جاۋاپ بولمادى. بۇل وتە تۇسىنىكسىز جاعداي. اقىرىندا مەن ءوز ۇسىنىسىمدى كەرى قايتارىپ الدىم. بۇل جەكپە-جەك «چەمپيوندار ءتۇنى» كەشىنىڭ ءبىر بولىگى بولۋى كەرەك ەدى. جانىبەك تاراپىنان ەشقانداي قارسىلىق بولعان جوق. بار ماسەلە – ادامەستە», – دەدى تۋركي ءال اش-شەيح Thaboxingvoice پودكاستىندا.

ايتا كەتەيىك, بۇل اقپاراتتى جانىبەكتىڭ ءوزى دە راستادى. ول X (بۇرىنعى Twitter) جەلىسىندە ءال اش-شەيحتىڭ سۇحباتىنان ءۇزىندى جاريالانعان ۆيدەونى بولىسكەن.