«Jánibek júrekke tıetin sóz aıtty»: Álimhanulyn 16 jyl baptaǵan alǵashqy bapkeri

Jánibek Álimhanulyn 7 jasynan bastap kásipqoı boksqa aýysqanǵa deıin jattyqtyrǵan bapker Murat Sıqymbaev júregine tıgen sátin aıtyp jetkizdi, dep habarlaıdy Qandastar.kz aqparat portaly.

SauBall YouTube arnasyna bergen suhbatynda bapker boksshyny 2001-2017 jyldar aralyǵynda jattyqtyrǵanyn aıtty.

«Jánibek 2017 jyldary maǵan júrekke tıetin sóz aıtty. «Aǵa» dedi. «Siz maǵan bárin aıttyńyz. Álem chempıony bolamyn dedim, boldym. Azııa chempıony bolamyn dedim, boldym. Azııa oıyndarynyń chempıony bolamyn dedim, boldym. Nege Olımpıadany aıtpadyńyz?» dedi. Men «Jánibek, óziń bilesiń ǵoı. Olımpıada degen ol – saıasat. Olımpıada komıteti bar. Birinshi raýndtan bastap jumys istemeseń…Shahmat sekildi. Bireýine berse, bireýine alyp qoıady. Olımpıada saıasat bolyp ketti» dedim. «Ondaı bolsa Murat aǵa, renjimeńiz. Batańyzdy berińiz. Kelesi Olımpıadaǵa deıin qalaı bolady, Qudaı biledi. Men kásipqoı aýysamyn» dedi. Men ne deımin? Batamdy berdim, ol kásipqoı boksqa aýysty», – deıdi bapker.