جانىبەكتى اسىراپ العان بەلگيالىق كەلىنشەك قايتىس بولدى

فوتو: ۆيدەودان سكرين

جۋرناليست قىمبات دوسجان الەۋمەتتىك جەلىدە جانىبەكتى اسىراپ العان اناسى قايتىس بولعانىن حابارلاپ, كوڭىل ايتتى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلادى.

تەلەجۇرگىزۋشىنىڭ ايتۋىنشا, ۆالەري ەۆتانازيامەن (ايىقپاس دەرتكە شالدىققان جانە ادام توزگىسىز ازاپتى باستان كەشىرگەن ادامنىڭ ءومىرىن توقتاتۋ) ومىرىمەن قوش ايتىستى.

«دوستار, جانىبەكتى اسىراپ العان ۆالەري اناسى بۇل ومىرمەن قوش ايتىستى. ەۆتانازيا تاسىلىمەن. 20 جىلدان بەرى جانىبەكتىڭ اناسى بولعان, ءوزى اۋىرسا دا, مەيىرىمىن جانىبەككە بەرە بىلگەن ۆالەريدىڭ ماڭگىلىك ءومىرى ەندى باستالدى. 54 جاس. جانىبەك بەرىك بول…» – دەپ جازدى جۋرناليست.

جازبانىڭ استىنا جانىبەكتىڭ ءوزى دە پىكىر قالدىردى.

«مەنى قولداعان تۋعان ەلىمدەگى ءار وتباسىعا العىس ايتامىن. مەن سىزدەردى جاقسى كورەمىن. جاقىندا سىزدەرمەن تاعى قاۋىشۋعا اسىقپىن», – دەدى جانىبەك.

جەلى قولدانۋشىلارى جانىبەكتىڭ قايعىسىنا ورتاقتاسىپ, كوڭىل ايتتى.