جاننا ۋرازباحوۆا سالتانات نۇكەنوۆانىڭ قازاسىنا قاتىستى ءىس بويىنشا تىڭ مالىمەت ايتتى

فوتو: اشىق دەرەككوز

قۋاندىق بيشىمباەۆتىڭ ءىسى بويىنشا نۇكەنوۆتەر وتباسىنىڭ مۇددەسىن قورعاعان ادۆوكات جاننا ۋرازباحوۆا Instagram جەلىسىندە جاڭا مالىمەتتەر جاريالادى. بۇل تۋرالى qandastar.kz  KAZ.NUR.KZ-كە سىلتەمە جاساپ حابارلايدى.

ادۆوكات جاننا ۋرازباحوۆا الەۋمەتتىك جەلىدە سالتانات نۇكەنوۆانىڭ ءولىمى بولعان ءتۇنى وقيعا ورنىنا بارعان تاكسي جۇرگىزۋشىسىنىڭ اڭگىمەسىن جەتكىزدى. ونىڭ ايتۋىنشا, ادۆوكات پەن تاكسي جۇرگىزۋشىسى 2024 جىلى شىلدە ايىندا ۋرازباحوۆا استاناعا جوعارعى سوتقا بارعان كەزدە كەزدەسىپ, تىلدەسكەن. جاننا ۋرازباحوۆامەن اڭگىمەلەسكەن تاكسي جۇرگىزۋشىسىنىڭ ايتۋىنشا, 2023 جىلعى 8 قاراشادان 9 قاراشاعا قاراعان ءتۇنى تاكسي جۇرگىزۋشىسى گاستروبارعا تاكسي شاقىرىلعانىن ايتقان. شاقىرتۋعا بارعان ول تاكسيدى كوشەدە ەر اداممەن بىرگە تۇرعان قىز شاقىرعانىن بىلگەن.

«قىز تاكسيگە وتىرماق بولعان. بىراق ونىڭ جانىندا تۇرعان ەر ادام ونىڭ شىنتاعىنان ۇستاپ الىپ, كولىككە وتىرۋىنا مۇمكىندىك بەرمەگەن. تاكسيست ولاردىڭ اراسىندا جانجال تۋىنداعانىن ءبىلىپ, ارالاسقىسى كەلگەن. الايدا سول كەزدە ەر ادام ەسىكتى اشىپ, بالاعات سوزدەر ايتىپ, بۇل ونىڭ ايەلى ەكەنىن, ەشقايدا كەتپەيتىنىن ايتقان. ول: «بۇل مەنىڭ مەيرامحانام, مەنىڭ كىم ەكەنىمدى بىلەسىڭ بە?» دەپ ايعايلاعان. تاكسيست شىداي الماي, كولىكتەن تۇسپەك بولعانىمەن, گاستروبار كۇزەتشىسى وعان اراشا تۇسكەن. ول جۇرگىزۋشىنىڭ كەتىپ قالۋىن ءوتىنىپ, بۇل جىگىت ولاردىڭ باستىعى ەكەنىن, توبەلەس شىعارۋدىڭ قاجەتى جوق ەكەنىن تۇسىندىرگەن», – دەپ جازدى جاننا ۋرازباحوۆا.

ۋرازباحوۆانىڭ ايتۋىنشا, تاكسي جۇرگىزۋشىسى كەتىپ قالعان, بولعان جايت تۋرالى ارىپتەستەرىنىڭ چاتىنا حابارلاعان.

«تاڭەرتەڭ ساعات 7-8 شاماسىندا وعان تاعى دا گاستروباردان قوڭىراۋ تۇسكەن. بىراق 15 مينۋت كۇتكەننەن كەيىن ول كەتىپ قالعان. ال بەينەباقىلاۋ كامەرالارىنان وسى كەزدە نە بولىپ جاتقانىن ءبىز بىلەمىز. سوندىقتان «سالتانات كەتىپ قالۋى كەرەك ەدى, ءوزى قالدى» دەيتىندەر, بىلە جۇرىڭىزدەر, ول كەتكىسى كەلگەن, بىراق كەتە الماعان. ءبىر جاققا قاشىپ كەتۋگە مۇمكىندىگى بولماعان», – دەپ جازدى ۋرازباحوۆا.