Janna Ýrazbahova Saltanat Núkenovanyń qazasyna qatysty is boıynsha tyń málimet aıtty

Foto: ashyq derekkóz

Qýandyq Bıshimbaevtyń isi boıynsha Núkenovter otbasynyń múddesin qorǵaǵan advokat Janna Ýrazbahova Instagram jelisinde jańa málimetter jarııalady. Bul týraly qandastar.kz  KAZ.NUR.KZ-ke silteme jasap habarlaıdy.

Advokat Janna Ýrazbahova áleýmettik jelide Saltanat Núkenovanyń ólimi bolǵan túni oqıǵa ornyna barǵan taksı júrgizýshisiniń áńgimesin jetkizdi. Onyń aıtýynsha, advokat pen taksı júrgizýshisi 2024 jyly shilde aıynda Ýrazbahova Astanaǵa Joǵarǵy sotqa barǵan kezde kezdesip, tildesken. Janna Ýrazbahovamen áńgimelesken taksı júrgizýshisiniń aıtýynsha, 2023 jylǵy 8 qarashadan 9 qarashaǵa qaraǵan túni taksı júrgizýshisi gastrobarǵa taksı shaqyrylǵanyn aıtqan. Shaqyrtýǵa barǵan ol taksıdi kóshede er adammen birge turǵan qyz shaqyrǵanyn bilgen.

«Qyz taksıge otyrmaq bolǵan. Biraq onyń janynda turǵan er adam onyń shyntaǵynan ustap alyp, kólikke otyrýyna múmkindik bermegen. Taksıst olardyń arasynda janjal týyndaǵanyn bilip, aralasqysy kelgen. Alaıda sol kezde er adam esikti ashyp, balaǵat sózder aıtyp, bul onyń áıeli ekenin, eshqaıda ketpeıtinin aıtqan. Ol: «Bul meniń meıramhanam, meniń kim ekenimdi bilesiń be?» dep aıǵaılaǵan. Taksıst shydaı almaı, kólikten túspek bolǵanymen, gastrobar kúzetshisi oǵan arasha túsken. Ol júrgizýshiniń ketip qalýyn ótinip, bul jigit olardyń bastyǵy ekenin, tóbeles shyǵarýdyń qajeti joq ekenin túsindirgen», – dep jazdy Janna Ýrazbahova.

Ýrazbahovanyń aıtýynsha, taksı júrgizýshisi ketip qalǵan, bolǵan jaıt týraly áriptesteriniń chatyna habarlaǵan.

«Tańerteń saǵat 7-8 shamasynda oǵan taǵy da gastrobardan qońyraý túsken. Biraq 15 mınýt kútkennen keıin ol ketip qalǵan. Al beınebaqylaý kameralarynan osy kezde ne bolyp jatqanyn biz bilemiz. Sondyqtan «Saltanat ketip qalýy kerek edi, ózi qaldy» deıtinder, bile júrińizder, ol ketkisi kelgen, biraq kete almaǵan. Bir jaqqa qashyp ketýge múmkindigi bolmaǵan», – dep jazdy Ýrazbahova.