جاپونيادا ون كۇندە 900 رەت جەر سىلكىنگەن

2025 جىلدىڭ 21 ماۋسىمىنان باستاپ جاپونيانىڭ وڭتۇستىگىندە ورنالاسقان توكارا ارالدارىندا 900-دەن استام جەر سىلكىنىسى تىركەلدى, دەپ حابارلايدى Qandastar.kz.

جاپونيانىڭ مەتەورولوگيالىق اگەنتتىگىنىڭ مالىمەتىنشە ەڭ كۇشتى جەر سىلكىنىسى 2 شىلدەدە بولعان. ول كەزدە جەر سىلكىنىسىنىڭ ماگنيتۋداسى 5,5-كە جەتتى. جەردىڭ قاتتى سىلكىنگەنىنە قاراماستان, ازىرگە ايتارلىقتاي ب ۇلىنۋلەر مەن ادام شىعىندارى تۋرالى حابار جوق. بىراق بيلىك جەرگىلىكتى تۇرعىنداردى ودان دا قۋاتتى سىلكىنىستەر بولۋى مۇمكىن دەپ ەسكەرتىپ, ەۆاكۋاتسياعا دايىن بولۋعا كەڭەس بەردى.

ەڭ كوپ سىلكىنىس – 183 – 23 ماۋسىمدا تىركەلگەن. وسى كۇننەن كەيىن سەيسميكالىق بەلسەندىلىك ءسال باسەڭدەگەنىمەن, ماۋسىم ايىنىڭ سوڭىندا قايتا كۇشەيدى: 29 ماۋسىمدا 98 جەر سىلكىنىسى, ال 30 ماۋسىمدا 62 جەر سىلكىنىسى بولدى. جەتى قونىستانعان ارالدان تۇراتىن ارحيپەلاگ بيلىگىنىڭ مالىمەتىنشە, بۇل ايماقتا شامامەن 700 ادام تۇرادى, جانە ولار ۇزدىكسىز سىلكىنۋلەردەن قاتتى شارشاپ, تۇندە ۇيىقتاۋعا قورقىپ قالعان.

مۇنداي سەيسميكالىق بەلسەندىلىكتىڭ كۇرت ارتۋى 2023 جىلدىڭ قىركۇيەگىندە دە بايقالعان – سول كەزدە توكارا ارالدارىندا 346 جەر سىلكىنىسى تىركەلگەن. جاپونيا ءتورت تەكتونيكالىق پليتانىڭ تۇيىسكەن جەرىندە ورنالاسقاندىقتان, بۇل ەلدە سەيسميكالىق قۇبىلىستار ءجيى بولىپ تۇرادى. جىل سايىن مۇندا شامامەن 1500 جەر سىلكىنىسى تىركەلەدى, بۇل جاپونيانى الەمدەگى ەڭ سەيسمواكتيۆتى ەلدەردىڭ بىرىنە اينالدىرادى.

ەل بيلىگى سونىمەن قاتار الداعى 30 جىلدا نانكاي جىرىعى ايماعىندا ورىن الۋى مۇمكىن مەگاجەر سىلكىنىسى قاۋپىن دە ەسكە سالدى. ساراپشىلاردىڭ بولجاۋىنشا, مۇنداي اپاتتىڭ ورىن الۋ ىقتيمالدىعى 75-82% ارالىعىندا. ەگەر بۇل بولجام راسقا اينالسا, سالدارى اپاتتى بولۋى مۇمكىن.