جاپپاي كىتاپ وقيتىن ۇلتقا اينالۋ ماڭىزدى

مەملەكەت باسشىسى  ۇلتتىق قۇرىلتايدا جاستاردى كىتاپ وقۋعا باۋلۋ كەرەگىن ايتتى. جاپپاي كىتاپ وقيتىن ۇلتقا اينالۋ ماڭىزدى. قازىر اتىراۋ وبلىسىندا 139 كىتاپحانا جۇمىس ىستەپ تۇر.

كىتاپ قورى شامامەن 2,5 ملن اسادى. ءوڭىر تۇرعىندارى مەن كىتاپحاناشىلار تاۋلىك بويى جۇمىس ىستەيتىن زاماناۋي كىتاپحانانىڭ دا اشىلعانىن قۇپتايدى. وڭىردەگى ەڭ باي كىتاپحانانىڭ ءبىرى ع. سلانوۆ اتىنداعى امبەباپ كىتاپحانا. قازىر مۇندا 360 مىڭنان اسا كىتاپ بار. بىلتىر جەرگىلىكتى بيۋدجەتتەن 15 ملن تەڭگەگە جۋىق قاراجات ءبولىنىپ, 3793 كىتاپ ساتىپ الىنعان.

قازىر جاستاردىڭ كىتاپ وقۋعا دەگەن ىنتاسى اشىلىپ كەلە جاتىر, دەيدى كىتاپحانا ديرەكتورى. ەگەر تاۋلىك بويى جۇمىس ىستەيتىن كىتاپحانا اشىلسا, ماماندار دا جۇمىس ىستەۋگە ءازىر.  سارا ىزمۇحامبەتوۆا, ع.سلانوۆ اتىنداعى امبەباپ كىتاپحانانىڭ ديرەكتورى: — ءبىز كىتاپحاناشىلار ەگەردە قولداۋ بولسا, كىتاپحانامىزدا جاڭا كىتاپتار كوپ كەلىپ, زاماناۋي كىتاپحانا ەتسە, ءبىزدىڭ كىتاپحاناشىلار ونداي جۇمىسقا دايىنبىز.

سەبەبى ول ءوزىمىزدىڭ ءسۇيىپ جاساپ جاتقان ماماندىعىمىز بولعاسىن, وقىرمانداردىڭ كەلىپ, كىتاپحانانى پايدالانۋعا ءبىز بىردەن ءبىر ۇلەسىمىزدى قوسا الامىز. جالپى كىتاپتىڭ زاماناۋي بولعاندا وقىرماندار كەلەدى دەپ ويلايمىن. سوندىقتان كىتاپ قورى جاڭا باسپادان شىعىپ جاتقان كىتاپپەن تولىعىپ وتىرسا…  مەملەكەت باسشىسى ۇلتتىق قۇرىلتايدا توقسانىنشى جىلدارداعى الاساپىران ۋاقىتىندا مىڭداعان كىتاپحانانىڭ جابىلىپ, ميلليونداعان كىتاپ قورىنان ايىرىلعانىمىزدى ايتتى. سوڭعى جىلدارى جاعدايدى تۇزەۋ ءۇشىن جۇمىستار ءجۇرىپ جاتىر. الماتى مەن استانادا تاۋلىك بويى جۇمىس ىستەيتىن كىتاپحانالار سالىنادى. پرەزيدەنت القالى جيىندا وسى جاقسى تاجىريبەنى وبلىس اكىمدەرىنىڭ جالعاستىرۋى كەرەگىن دە تىلگە تيەك ەتتى. تاۋلىك بويى جۇمىس ىستەيتىن زاماناۋي كىتاپحانا تۋرالى ءوڭىر جاستارىنىڭ دا پىكىرىن تىڭداپ كوردىك. بليتس: — جاستاردىڭ جينالاتىن جاقسى ءبىر الاڭى بولار ەدى دەپ ويلايمىن. ول جەردە ديسكۋسسيا بولادى, جاڭا يدەيالار دۇنيەگە كەلەدى.

جاقسى ورتا قالىپتاسادى. قولدايمىن. كىتاپ وقۋ ماسەلەسىنە كەلەتىن بولساق, جاستاردى كىتاپ وقۋعا تارتۋ ماسەلەسىن ءبىر جۇيەگە كەلتىرۋ كەرەك دەگەن ويدامىن.  — كوپ ادام جۇمىس ۋاقىتىندا بارا المايدى. ساباق ۋاقىتىندا, مىسالى. سول ءۇشىن كەشكى ۋاقىتتا بىزگە باراتىنداي ىڭعايلى بولار ەدى.  — قازىرگى تاڭدا جاستاردىڭ كىتاپ وقۋعا دەگەن ىنتاسى بارا-بارا ءوسىپ كەلەدى. سەبەبى شەتەلدىك ادەبيەت قازاق تىلىنە جاقسى اۋدارىلۋدا.  ۇستازدار قاۋىمى دا تاۋلىك بويى جۇمىس ىستەيتىن زاماناۋي كىتاپحانا سالۋ تۋرالى ۇسىنىستى قولدايدى. ويتكەنى جاستاردىڭ كىتاپ وقۋعا دەگەن قۇلشىنىسىن ارتتىرۋ ەل مادەنيەتىنىڭ دامۋىنا جول اشادى.

سالامات ءىدىرىسوۆ, پەداگوگيكا عىلىمدارىنىڭ كانديداتى: — اتىراۋ وبلىسىندا دا وسىنداي ۇلكەن, ءارى جاستارعا ارنالعان كىتاپحانا كەرەك. ءابىش كەكىلباەۆتىڭ ءبىر جاقسى ءسوزى بار: «ادامدى ادام ەتكەن كىتاپ, ادامزات ەتكەن كىتاپحانا.» جاڭا زاماناۋي كىتاپحانالاردىڭ سالىنۋى وتە قاجەتتى جانە قازىرگى كۇننىڭ سۇرانىسى دەپ ەسەپتەيمىن. اسلانبەك شىعىر, ءتىلشى: — كىتاپحانا مەملەكەتتىڭ, ۇلتتىڭ نەگىزگى جادى. ەلىمىز ءۇشىن قۇندى دەرەكتەر مەن ماتەريالداردىڭ دەنى كىتاپحانادا ساقتالادى. مەملەكەت باسشىسى ءۇشىنشى ۇلتتىق قۇرىلتايدا جاستاردى كىتاپ وقۋعا باۋلۋ وزىق ويلى ۇلت بولۋعا دەگەن ماڭىزدى ۇمتىلىس ەكەنىن ايتتى. ەندەشە ۇيالى تەلەفونعا تەلمىرمەي, تەلەگەي ءبىلىم تەڭىزىنە باعىت الار ۋاقىت كەلدى.