Jartyjyldyq qorytyndy: Oqý-aǵartý mınıstrligi Bilim sapasyn baǵalaýdyń ulttyq júıesiniń jańa modelin bekitti

Foto: ashyq derekkóz

Qazaqstannyń Oqý-aǵartý mınıstrligi bilim berý júıesin jetildirýge baǵyttalǵan baǵdarlamalar men jobalardy iske asyrýdy jalǵastyrýda. Bilim berý ınfraqurylymy damýda, ıfrlyq tehnologııalar engizilýde, balalardyń quqyǵyn qorǵaý jáne qaýipsizdigin arttyrý sharalary kúsheıtilýde.

Qazaqstandyq oqýshylardyń 2024 jyldyń birinshi jartyjyldyǵynda halyqaralyq olımpıadalarda qandaı jetistikterge qol jetkizgeni jáne bilim berý salasynyń basqa da negizgi kórsetkishteri týraly Primeminister.kz sholý materıalynan oqyńyzdar.

Búgingi tańda Oqý-aǵartý mınıstrliginiń qaramaǵynda 22 myń bilim berý uıymy bar, onyń ishinde 11,5 myńnan astam balabaqsha, 8 myń mektep jáne 700 kolledj jumys istep tur. Bilim alýshylardyń jalpy sany – 6 mln, al pedagogtar sany – 600 myńǵa jýyq.

Infraqurylym: damý jáne jańǵyrý

Birinshi jartyjyldyqta 27 myńǵa jýyq jańa mektepke deıingi oryndar ashyldy, bul – balalardy sapaly mektepke deıingi tárbıemen jáne oqytýmen qamtýdy 91,5%-ǵa deıin ulǵaıtýǵa yqpal etti. Qala men aýyl arasyndaǵy bilim berý múmkindikterindegi alshaqtyqty azaıtý úshin jańa oqýshy oryndary engizilýde, jyl saıyn 1 myń aýyl mektebi jańǵyrtylady jáne robotty tehnıka, hımııa, bıologııa, fızıka jáne STEM-zerthanalar boıynsha zamanaýı pándik kabınetter satyp alynady.

Sondaı-aq mamandandyrylǵan bilim berý mekemeleriniń jelisin keńeıtý sharalary jalǵasýda. Inklıýzıvti bilim berýge jaǵdaı jasaǵan mektepterdiń úlesi 88%-ǵa deıin artty, al balalardy arnaıy psıhologııalyq-pedagogıkalyq qoldaýmen qamtý 80%-ǵa jetti. Inklıýzıvti bilim berýdi qamtamasyz etý úshin qosymsha krıterııler ázirlendi.

Kolledj stýdentteriniń turǵyn úı jaǵdaıy jaqsarýda. Elimizdiń óńirlerinde 2,6 myń tósek-orynǵa arnalǵan 11 jańa jataqhananyń qurylysy júrgizilip jatyr, bul stýdentterdiń 85%-dan astamyn úı-jaımen qamtamasyz etýge múmkindik beredi.