جاس كاراتەشىلەر ءباا-دە وتكەن تۋرنيردە 4 التىن جەڭىپ الدى

فوتو: اشىق دەرەككوز

ءباا-ءنىڭ فۋدجەيرا قالاسىندا جاستار اراسىنداعى ا سەرياسىنىڭ 2025 جىلداعى العاشقى ءتۋرنيرى اياقتالدى. قازاقستاندىق سپورتشىلار 11 مەدال جەڭىپ الدى. بۇل تۋرالى قازاقستان كاراتە فەدەراتسياسىنىڭ ءباسپاسوز قىزمەتى مالىمدەدى, دەپ جازدى qandastar.kz

بۇل سىندا قازاقستان سپورتشىلارى 11 مەدالمەن (4 التىن, 7 قولا) جالپى ەسەپتە 4-ساتىعا جايعاستى. ال اتالعان دودادا رەسەي سپورتشىلارى كوش باستاسا, ەكىنشى ورىنعا يران قۇراماسى قول جەتكىزدى. ال ۇزدىك ءۇشىنشى ورىنعا مىسىر كومانداسى يە بولدى.

العاشقى التىندى كۋميتە باعدارلاماسىندا دىنمۇحاممەد ايداربەك (U16-17) 55 كگ دەيىنگى سالماقتا توپ جارىپ, قورجىنعا سالدى. دىنمۇحاممەد 2023 جىلى وسى فۋدجەيراداعى جارىستا 3-ورىن العان.

وسىدان كەيىن 14-15 جاس ساناتىندا نۇراسىل نۇرسەيىت (-52 كگ) پەن سۇڭقار قانيبەك (-70 كگ) چەمپيون اتاندى. نۇراسىل اسا تارتىستى وتكەن فينالدا ماكسيم ۆيەچكانوۆتى (ۋكراينا), سۇڭقار حورۆاتيا وكىلىن تىزە بۇكتىردى. ال شەشۋشى جارىس كۇنى اياۋلىم تىلەكتەس (-47 كگ) بارلىق 6 جەكپە-جەكتە قارسىلاسىن جەڭىپ, مىقتى ەكەنىن كورسەتتى.

قولا مەدال جەڭىپ الىپ, ۇزدىك ۇشتىككە كىرگەن سپورتشىلارىمىزدىڭ ءتىزىمى:

U21 جاس ساناتى – اقنيەت شەريزات (-55 كگ)

U16-17 جاس ساناتى – گۇلنۇر قويشىباي (-59 كگ);

U14-15 جاس ساناتى – امير كەڭەسباي (-52 كگ), رۋسلان ەركىن (-57 كگ), باتىر ءادىل (-57 كگ);

U12-13 جاس ساناتى – ارنۇر مۇرات (-45 كگ) پەن ينسار احماديەۆ (-50 كگ);

ايتا كەتەيىك, فۋدجەيراداعى تۋرنيرگە 87 مەملەكەتتەن 2 400-گە جۋىق سپورتشى جينالدى. قازاقستاننان بيىل بارلىعى 140 كاراتەشى سىنعا ءتۇستى. جاستار اراسىنداعى سەريانىڭ كەلەسى كەزەڭىن گۆادالاحارا قالاسى (يسپانيا) قابىلدايدى.