Jas mamandar óz jobasyn jasaqtady

Aqtaýda júz jas maman joba jasaqtady. Endi qarasha aıynyń sońyna deıin jobasyn mektepte oryndaýdy josparlap otyr.

Aldymen muǵalimder joba jasaqtaý jáne onyń oryndalýyn basqarý boıynsha mentor, trener, koých Fatıma Salqynbaevanyń «Jobalyq basqarý» atty oqytýynan ótti. Oqytý barysynda joba, onyń túrleri men negizderi, joba jazýda eskeriletin erejeler men baǵyt tańdaýdaǵy ózektiligi aıtyldy. Sonyń nátıjesinde jas mamandar 5 topqa bólinip, óziniń jobasyn jasaqtady. Sondaı-aq joba mektep ishinde iske asyrýǵa sheshim qabyldap otyr.

Oqytýǵa qatysqan jas mamannyń biri — «Shahta» mektebinen kelgen hımııa pániniń muǵalimi Aqmaral Álibekqyzy. Ol «Jas zertteýshiler» atty jobanyń qańqasyn qalap, maqsaty men mindetin aıqyndap qoıǵan.

— Meniń oıymsha, «Jas basqarýshylar» mektebi jaqsy oılastyrylǵan. Muǵalimder tek sabaq berip qana júrmeı, túrli jobany qolǵa alýy kerek. Bul rette, biz, trener Fatıma Salqynbaevadan jobalyq basqarý boıynsha bilim alyp, tájirıbemizde qoldanbaqpyz. Bizdiń toptyń usynǵan jobasy — «Jas zertteýshiler». Bizdiń maqsat — memleket tarapynan ǵylymdy damytýǵa berilip jatqan múmkindik pen qarjyny tıimdi paıdalaný. Al ol úshin oqýshylardyń ǵylymı jumyspen aınalysýyna járdemdesip, qyzyǵýshylyǵyn arttyrý qajet. Búgingi muǵalimderdiń jobasy balalardyń ǵylymǵa súıispenshiligin oıatady degen oıdamyn, — deıdi jas maman Aqmaral Álibekqyzy.

Aıta keteıik, buǵan deıin jas mamandar «Kóshbasshy ımıdji», «Grant. Konkýrs. Joba» jáne «Qarjylyq menedjment» boıynsha bilim aldy.