جاس ساربازدار اباتتاندىرۋعا اتسالىسىپ ءجۇر

13 ساۋىردەن بەرى استانادا «تازا قازاقستان. استانا – تازالىق پەن ءتارتىپتىڭ ۇلگىسى» اتتى اۋقىمدى ەكولوگيالىق ناۋقان ءجۇرىپ جاتىر. بۇل اپتا تاريحي-مادەني ەسكەرتكىشتەردىڭ اۋماعىن اباتتاندىرۋ جۇمىستارىنا ارنالادى.

5 اپتاعا جالعاساتىن يگى ىسكە بەلسەندى جاستار دا اتسالىسىپ جاتىر. «جاس سارباز» پاتريوتتىق قوزعالىسىنىڭ ستۋدەنتتەرى «كيەلى مەكەن» ۇرانىمەن ءوتىپ جاتقان اپتالىقتىڭ بۇل شەڭبەرىنە بەلسەندى قاتىسىپ جاتىر. ەكواكتسيا اياسىندا 50-دەن استام «جاس سارباز» جاۋىنگەرى سارىارقا داڭعىلىندا ورنالاسقان كەڭەس وداعىنىڭ باتىرى تالعات بيگەلدينوۆتىڭ ەسكەرتكىشىنىڭ ماڭىندا تازالىق جۇمىستارىن جۇرگىزدى.

مانشۇك يساەۆا, «بىرىككەن مۇراجايلار ديرەكتسياسى» مكقك قىزمەتكەرى: — ەلوردامىز استانا قالاسىندا بارلىعى 117 ەسكەرتكىش بار. ونىڭ 46-سى مەملەكەت قورعاۋىندا. «كيەلى مەكەن» اپتالىعى باستالعالى ەلوردادا 40-تان استام ەسكەرتكىش تازارتىلدى.

جاستار ەكولوگيالىق ناۋقان اياسىندا مادەني مۇرا نىساندارىنىڭ قاسبەتتەرىن, ەسكەرتكىشتەر مەن ىرگەلەس اۋماقتاردى رەتكە كەلتىرۋ بويىنشا تازالىق جۇمىستارىن جۇرگىزىپ جاتىر. كوپ كۇشىمەن جاسالىنعان يگى ءىس ەلدىڭ كوڭىلىنەن شىعىپ وتىر. مەملەكەتتىك قۋىرشاق تەاترىنىڭ باسشىسى: «تابيعاتتى ايالاۋدىڭ استارىندا تاربيەنىڭ تەرەڭ تامىرى جاتىر», – دەيدى. توعجان حاسانعاليەۆا, «مەملەكەتتىك قۋىرشاق تەاترى» مكقك باسشىسى: — بۇل – قالاعا, وتانعا دەگەن ماحابباتىمىزدىڭ ايىرىقشا كورىنىسى جانە وسكەلەڭ ۇرپاققا,جاستارعا ءوز جەرىڭدى ايالاپ, قامقور بولۋعا, تازا ۇستاۋعا باۋليتىن جاقسى ۇلگى.  ەڭ باستىسى – بۇل جەرگە دەگەن قۇرمەت پەن ماحاببات.

سەبەبى بۇل جەردە ءبىزدىڭ بالالارىمىز, بولاشاق ۇرپاق ءومىر سۇرەدى. استاناداعى اۋقىمدى ناۋقان 5 اپتاعا سوزىلادى. ولاردىڭ ارقايسىسى بەلگىلى ءبىر تاقىرىپقا ارنالعان. ياعني, «جاسىل ايماق» دەپ اتالاتىن ءۇشىنشى اپتا اعاش وتىرعىزۋ مەن كوشەتتەردى اكتەۋگە ارنالسا, «ءمولدىر بۇلاق» دەپ اتالاتىن بەسىنشى اپتادا وزەن-كولدەردىڭ ماڭايى قوقىستان تازارتىلادى. «جاس سارباز» اسكەري-پاتريوتتىق قوزعالىسىنىڭ ستۋدەنتتەرى: «ناۋقان اياقتالعانعا دەيىن ايانىپ قالمايمىز», – دەپ وتىر.