JAS SARBAZDAR ABATTANDYRÝǴA ATSALYSYP JÚR

13 sáýirden beri Astanada «Taza Qazaqstan. Astana – tazalyq pen tártiptiń úlgisi» atty aýqymdy ekologııalyq naýqan júrip jatyr. Bul apta tarıhı-mádenı eskertkishterdiń aýmaǵyn abattandyrý jumystaryna arnalady.

5 aptaǵa jalǵasatyn ıgi iske belsendi jastar da atsalysyp jatyr. «Jas sarbaz» patrıottyq qozǵalysynyń stýdentteri «Kıeli meken» uranymen ótip jatqan aptalyqtyń bul sheńberine belsendi qatysyp jatyr. Ekoakııa aıasynda 50-den astam «Jas sarbaz» jaýyngeri Saryarqa dańǵylynda ornalasqan Keńes Odaǵynyń batyry Talǵat Bıgeldınovtiń eskertkishiniń mańynda tazalyq jumystaryn júrgizdi.

Mánshúk Isaeva, «Birikken murajaılar dırekııasy» MKQK qyzmetkeri: — Elordamyz Astana qalasynda barlyǵy 117 eskertkish bar. Onyń 46-sy memleket qorǵaýynda. «Kıeli meken» aptalyǵy bastalǵaly elordada 40-tan astam eskertkish tazartyldy.

Jastar ekologııalyq naýqan aıasynda mádenı mura nysandarynyń qasbetterin, eskertkishter men irgeles aýmaqtardy retke keltirý boıynsha tazalyq jumystaryn júrgizip jatyr. Kóp kúshimen jasalynǵan ıgi is eldiń kóńilinen shyǵyp otyr. Memlekettik qýyrshaq teatrynyń basshysy: «tabıǵatty aıalaýdyń astarynda tárbıeniń tereń tamyry jatyr», – deıdi. Toǵjan Hasanǵalıeva, «Memlekettik qýyrshaq teatry» MKQK basshysy: — Bul – qalaǵa, Otanǵa degen mahabbatymyzdyń aıyryqsha kórinisi jáne óskeleń urpaqqa,jastarǵa óz jerińdi aıalap, qamqor bolýǵa, taza ustaýǵa baýlıtyn jaqsy úlgi.  Eń bastysy – bul jerge degen qurmet pen mahabbat.

Sebebi bul jerde bizdiń balalarymyz, bolashaq urpaq ómir súredi. Astanadaǵy aýqymdy naýqan 5 aptaǵa sozylady. Olardyń árqaısysy belgili bir taqyrypqa arnalǵan. Iaǵnı, «Jasyl aımaq» dep atalatyn úshinshi apta aǵash otyrǵyzý men kóshetterdi ákteýge arnalsa, «Móldir bulaq» dep atalatyn besinshi aptada ózen-kólderdiń mańaıy qoqystan tazartylady. «Jas sarbaz» áskerı-patrıottyq qozǵalysynyń stýdentteri: «naýqan aıaqtalǵanǵa deıin aıanyp qalmaımyz», – dep otyr.