Jasóspirim Sherzat Bolattyń ólimi. Oqıǵa ornyna IIM orynbasary bardy

Foto: Ulysmedia

Ishki ister mınıstriniń birinshi orynbasary Talǵarda bolǵan qandy oqıǵa ornyna bardy, dep habarlaıdy Ulysmedia.kz.

JEDEL-TERGEÝ TOBY QURYLDY

Ishki ister mınıstriniń tapsyrmasy boıynsha men oqıǵa ornyna keldim. Jedel-tergeý toby quryldy. Menimen birge Ishki ister mınıstrliginiń ókilderi qyzmet atqarýda. Beınejazbalar tekserilip, kýágerlerdi anyqtaý jumystary júrgizilip jatyr. Qylmyskerler ustalyp, jaýapqa tartylatyn bolady. Qylmystyq is mınıstrdiń erekshe baqylaýynda, – dedi Baýyrjan Alenov.

TALǴARDAǴY QANDY OQIǴA

Eske sala keteıik, Almaty oblysynda jas jigitterdiń tóbelesi 16 jastaǵy jasóspirimniń ólimimen aıaqtalǵan. Marqum dúkende saýda jasap turǵan ákesimen eregesken klıentpen tóbelesken. Buryn taraǵan aqparattarǵa qaraǵanda, klıent dúkennen syra alyp, aqshasyn tólemeı ketpek bolǵan. Tóbeles sol úshin týyndaǵan. Syrany tegin alyp ketpek bolǵan jigit jaqtastaryn shaqyryp, ákesi men balasyn, týys aǵasyn soqqyǵa jyqqan. Bir top jigit jasóspirimdi tepkilep jatqanyn mańaıdaǵy turǵyndar vıdeoǵa túsirip alǵan. 10-shy synypta oqıtyn Sherzat Bolat ata-anasynyń dúkenine kezdeısoq kelgen. Sýyq qarýmen kelgen buzaqylar eshkimdi aıamapty.

Prokýratýra Talǵardaǵy jasóspirimniń ólimine qatysty málimdeme jasap, «ádil tergeýge kepildik beremiz» dep aqparat taratqan. Alaıda tergeýshilerge senbegen marqumnyń týǵan-týystary kóshege shyǵyp, ádildikti talap etti. Olar sol túni bolǵan 13 adamnyń ornyna 7 adamnyń ǵana qamalǵanyna narazylyq bildirdi. Kóp ótpeı marqum Saltanat Núkenovanyń aǵasy, quqyqqorǵaýshy Aıtbek Amangeldi Talǵarda óltirilgen bozbalanyń otbasyna tegin advokat taýyp beretini habarlandy.

Buǵan deıin qaza tapqan jasóspirimniń ákesi beınebaqylaý kamerasynyń jazbasyn áldekimder óshirip tastaǵanyn aıtqan edi. Alaıda IIM ol málimetti joqqa shyǵardy. 9 qazanda depýtat Nartaı Aralbaıuly bas prokýror Berik Asylovqa, ishki ister mınıstri Erjan Sádenovke jáne oqý-aǵartý mınıstri Ǵanı Beısembaevqa depýtattyq saýal joldap, 16 jasar azamatty óltirgen, jaqyndaryn aıaýsyz sabaǵan qylmyskerler qamaýǵa alynyp, olarǵa zańǵa sáıkes ádil jaza berilýi tıis dep másele kóterdi. Al onyń áriptesi Abzal Quspan qylmystyq kodekstiń 201-babyn (sotqa deıingi tergep-tekserý derekterin jarııa etýge jol bermeý) ózgertý kerek dep esepteıdi. Bul qajettilik onyń sózinshe, Talǵardaǵy jasóspirimniń óliminen keıin aıqyn sezilgen.

Ulysmedia.kz kúdiktilerdiń biri taıaýda qylmystyq jaýapkershilikke tartylyp, jazasyn óteýi kerek bolǵanyn, ekinshi kúdikti jaýapkershilikten jaltaryp ketkenin anyqtaǵan edi.