جاڭالىقتار
«جاستار اداسىپ ءجۇر, ساقالدى سپورتشىلاردىڭ كوبەيگەنى الاڭداتادى» – باقتيار ارتاەۆ
فوتو: اشىق دەرەككوز
وليمپيادا ويىندارىنىڭ چەمپيونى باقتيار ارتاەۆ ASSYLTAS TV Youtube ارناسىنا بەرگەن سۇقباتىندا ۇلتتىق قۇندىلىقتارىمىز جايلى تولعانىپ, وتاندىق سپورتتان قازاقى قاسيەتتىڭ الىستاپ بارا جاتقانىن ايتتى. سونىمەن قاتار سپورتشىلارىمىز ساقال دا قويعانىنا اشىندى, دەپ حابارلايدى qandastar.kz Alash.KZ ۇلتتىق پورتالىنا سىلتەمە جاساپ.
وليمپيادا ويىندارىنىڭ چەمپيونى جاستاردىڭ قازىر اداسىپ جۇرگەنىن ايتتى:
«كەزىندە اتا-بابالارىمىز «ارۋاق!» دەپ جاۋعا شاپقان. قازىر ونى ءبىر كۇندە جويىپ جىبەردى. مەنى ساقالدى جىگىتتەر سوگەتىن شىعار, بىراق بۇل بولعان دۇنيە عوي. باتىرلارىمىز ارۋاقتاردىڭ باسىنا بارىپ سىيىنباعان, كەرىسىنشە قۇران باعىشتاعان. مەن وليمپياداعا بارار كەزدە قوجا احمەت ياسساۋي, بابا تۇكتى شاشتى ءازىز. قاراحان, ايشا ءبيبى, ءبارىن ارالاپ, قۇران باعىشتادىم. قازاقتا: «ءولى رازى بولماي, ءتىرى بايىمايدى»,—دەگەن جاقسى ءسوز بار. ونىڭ ءبارى جايدان-جاي الىنباعان. وكىنىشكە قاراي, سوڭعى كەزدەرى جاستارىمىز ءسال شاتاسىپ, بارلىق نارسەنى بۇرمالاپ جاتىر. سالت-داستۇرمەن كەلە جاتقان دۇنيەلەردى جوعالتپاۋىمىز كەرەك»,—دەدى بوكسشى.
كەيىن ساقالدى جىگىتتەرگە قاتىستى پىكىر ءبىلدىردى:
«ءبىز ەلىكتەگىش حالىقپىز قوي. سونىڭ ارقاسىندا سپورتشىلارىمىز ساقال دا قويدى. بۇرىن سۇقبات بەرگەندە دە ايتىپ ەدىم. مەنىڭ ويىمشا, ءوز-ءوزىن دالەلدەي الماعان جىگىتتەر ساقال قويىپ, وسىلاي وزدەرىن دالەلدەگىسى كەلەتىن سياقتى. سپورتشىلارىمىزعا بۇل سالادا رەجيم كەرەك دەپ ءجيى ايتامىن. اللانىڭ ءوزى ەڭبەك ەتسەڭ, بەرەمىن دەيدى. تالاپتانباساڭ, ەڭبەكتەنبەسەڭ, ازاننان كەشكە دەيىن ناماز وقىپ, دايىندىعىڭدى جاساماساڭ, اللا ساعان قالاي بەرەدى? ون ەكى مۇشەڭ ساۋ, جاتتىعۋ زالىنا بارار مۇمكىندىگىڭ بولسا, وندا ارەكەت ەتۋ كەرەك. قۇدايدان تىلە, الايدا ءىس-ارەكەت سەنەن بولۋى ءتيىس. سپورت — قىسقا عانا عۇمىر. مۇمكىن 4 جىلعا, مۇمكىن 8 جىلعا سوزىلادى. بىرەۋلەر ءتىپتى ۇلتتىق قۇراما ساپىنا قوسىلا الماي كەتەدى. سول ءۇشىن مۇمكىندىك بەرىلدى مە, ونى تولىعىمەن سپورتقا ارنا. جۇرەگىڭ تازا بولسا, اللا سەنى ەشقاشان توزاققا اپارىپ تىقپايدى. جۇرەگىڭ تازا بولسا, سپورتتان كەيىن بەس ۋاقىت نامازىڭدى وقى, قاجىلىققا بار, اتا-اناڭا قىزمەت جاسا. بىراق سپورتتىق مانسابىڭدى اياقتا. سپورتتا جۇرگەن كەزدە تاڭەرتەڭ, تۇندە تۇرىپ, ۇيقىڭ قانباي, ءوز-ءوزىڭدى قيناي بەرەتىن بولساڭ, بۇل سالادا ەشقانداي ناتيجەگە قول جەتكىزە المايسىڭ»,—دەدى باقتيار ارتاەۆ.
