جاستار اراسىنداعى توبەلەس: قوناەۆتاعى بىرنەشە ادامدى كولىكپەن قاققان ءسات ۆيدەوعا ءتۇسىپ قالدى

فوتو: ۆيدەودان سكرين

الماتى وبلىسى, قوناەۆ قالاسىندا جاستار اراسىنداعى جانجالدىڭ ۆيدەوسى الەۋمەتتىك جەلىدە تارادى, دەپ جازدى qandastar.kz

كادرلاردان ەكى توپتىڭ توبەلەسكە جينالعانى انىق كورىنەدى. بۇل تۋرالى Stan.kz اقپارات اگەنتتىگى حابارلايدى.

الدىمەن ءبىر توپ جىگىت بىرنەشە كولىكپەن كەلىپ, باگاجدان قارۋعا ۇقساس زاتتاردى شىعارا باستايدى. الايدا قارسى توپ ولاردى كۇتپەگەن جەردەن كولىكپەن قاعىپ وتكەن. جۇرگىزۋشىلەر توقتاماي, كولىكتەن شىقپاي, ادەيى ادامداردى باسىپ وتكەن ءسات تە بەينەجازباعا ءتۇسىپ قالعان.

ۆيدەو كادرلارىندا ەكى ادامنىڭ قاققانىن انىق بايقاۋعا بولادى. جاراقات العانداردى دوستارى كولىككە سالىپ الىپ كەتكەن. كەيىن ءبىر جاس جىگىتكە مەديتسينالىق كومەك كورسەتىلىپ جاتقانى كورىنەدى, ونىڭ بەتى قاتتى جارالانعان.

كۋاگەرلەردىڭ ايتۋىنشا, بۇل جانجالعا وتكەن جىلى بولعان اتىسقا قاتىسى بار كەيبىر ادامدار دا ارالاسقان. ول وقيعادا 20 جاستاعى جىگىت قازا تاۋىپ, بىرنەشە ادام سوتتالعان ەكەن.

جابىرلەنۋشىلەردىڭ تۋىستارى دا وقيعا جايلى پىكىر ءبىلدىردى. ۋرازالين جانداربەكتىڭ جارى اكەركە ەرمەكتىڭ ايتۋىنشا, قايعىلى جاعداي 21 تامىز كۇنى كەشكى ساعات شامامەن 22:10-22:30 ارالىعىندا بولعان. سول كۇنى نۋراسىل, اميرجان جانە داۋرەننىڭ اراسىندا جانجال تۋىنداپ, وقيعا ورنىنا بولات ەسىمدى ازامات كەلگەن.

كۋاگەرلەردىڭ سوزىنشە, ونىڭ قولىندا قارۋ بولىپ, ول نۋراسىل مەن اميرجاندى قۋا جونەلگەن. ەكەۋى «پودحوز» جاقتان «باۆارياعا» قاراي بەت الىپ, الدىن الا جانداربەككە حابارلاسىپ, كەزدەسۋگە شىعۋىن وتىنگەن. ءدال وسى ساتتە جانداربەككە كولىك قاساقانا سوققان.

جابىرلەنۋشى تاراپ كىنالىلەر ءىستى باسقا ارناعا بۇرىپ, وزدەرىنە تاعىلعان ايىپتى جاسىرۋعا تىرىسىپ جاتقانىن العا تارتادى.

الماتى وبلىسىنىڭ پوليتسياسى وقيعاعا بايلانىستى تۇسىنىكتەمە بەردى.

«پوليتسيا قىزمەتكەرلەرى ءىزىن سۋىتپاي ەكى كۇدىكتىنى انىقتاپ, ۇستادى جانە ۋاقىتشا ۇستاۋ يزولياتورىنا قامادى. قازىر بولعان وقيعانىڭ بارلىق ءمان-جايىن جان-جاقتى ءارى وبەكتيۆتى انىقتاۋعا باعىتتالعان كەشەندى تەرگەۋ شارالارى جۇرگىزىلىپ جاتىر», – دەلىنگەن پوليتسيا جاۋابىندا.

پوليتسيا ازىرگە توبەلەس كەزىندە جاراقات العاندار تۋرالى ناقتى مالىمەت بەرگەن جوق.
ەسكە سالايىق, بۇعان دەيىن اقتوبەدە كوپقاباتتى ءۇي اۋلاسىندا بەتپەردە كيگەن ەر ادام اۆتوكولىكتىڭ اينەگىن سىندىرىپ, جۇرگىزۋشىنى تاياقپەن ۇرعان. وقيعا بەينەباقىلاۋ كامەراسىنا ءتۇسىپ قالعان. جاراقات العان جۇرگىزۋشى اۋرۋحاناعا جەتكىزىلدى. پوليتسيا كۇدىكتىنى ۇستاعانىن حابارلادى.