الەۋمەت جانە قوعام
جازانى قاتاڭداتۋ: پرەزيدەنت مەديتسينا قىزمەتكەرلەرىنىڭ ۇسىنىسىن قولدادى
فوتو: Freepik
مەملەكەت باسشىسى مەديتسينا قىزمەتكەرلەرىنە كۇش كورسەتەتىندەرگە جازانى قاتاڭداتۋ تۋرالى ۇسىنىستى قولدادى, دەپ جازدى qandastar.kz پرەزيدەنتتىڭ ءباسپاسوز حاتشىسى رۋسلان جەلدىبايعا سىلتەمە جاساپ.
«مەملەكەت باسشىسى مەديتسينا قىزمەتكەرلەرىنە شابۋىل جاساپ, كۇش قولدانىپ جانە قاتىگەزدىك تانىتقان ارەكەتتەرگە قاتىستى جازانى قاتاڭداتۋ ماقساتىندا ۇلتتىق زاڭناماعا وزگەرىستەر ەنگىزۋ تۋرالى پارلامەنت دەپۋتاتتارىنىڭ, دەنساۋلىق ساقتاۋ سالاسى وكىلدەرىنىڭ جانە بەلسەندى ازاماتتاردىڭ ۇسىنىسىن قولدايدى.
دارىگەرلەردىڭ دەنساۋلىعىنا نۇقسان كەلتىرىپ, ومىرىنە قاۋىپ توندىرەتىن مۇنداي كەلەڭسىزدىكتەرگە «زاڭ جانە ءتارتىپ» قاعيداتىنا سايكەس قۇقىقتىق تۇرعىدا باتىل تۇردە توسقاۋىل قويىلۋى كەرەك.
پرەزيدەنت ۇكىمەتكە ءتيىستى زاڭنامالىق تۇزەتۋلەر ازىرلەۋدى تاپسىردى. بۇل باستاما پارلامەنتتە ازاماتتىق قوعام وكىلدەرىمەن بىرگە تالقىلانادى», — دەپ جازدى رۋسلان جەلدىباي Telegram-داعى ارناسىندا.
