جەدەل جاردەم ۇيدە قىزمەت كورسەتۋدى توقتاتپايدى

فوتو: اشىق دەرەككوز

دەنساۋلىق ساقتاۋ مينيسترلىگى جەدەل جاردەم تۇنگى شاقىرتۋلارعا بارمايدى دەگەن جاڭالىققا تۇسىنىكتەمە بەردى, دەپ حابارلايدى qandastar.kz. ايتۋلارىنشا, وزگەرىستەر كەرىسىنشە قىزمەت ساپاسىن جاقسارتىپ, ناۋقاسقا تەز جەتۋ ءۇشىن جاسالىپ وتىر. ويتكەنى جەدەل جاردەم كەشىگىپ كەلەدى دەگەن شاعىم كوبەيگەن.

سوندىقتان 4-ءشى ساناتتاعى شاقىرتۋلارعا جەدەل جاردەم جۇمىس كۇندەرى تاڭعى ساعات 8:00-دەن كەشكى ساعات 18:00 بارادى, ال سەنبىدە تاڭعى 8:00-دەن 12:00-گە دەيىن قىزمەت كورسەتەدى.

4-ءشى ساناتقا قانداي جاعدايلار كىرەدى? ادامنىڭ ءومىرى مەن دەنساۋلىعىنا قاۋىپ توندىرمەيتىن ء(جىتى نەمەسە سوزىلمالى) اۋرۋلاردىڭ ءورشۋى, اللەرگيالىق اۋرۋلار, جەڭىل جاراقاتتار (كۇيىكتەر, كوگەرۋلەر), جاندىكتەردىڭ شاعۋى, قۇسۋ, دەنە قىزۋىنىڭ كوتەرىلۋى سياقتى جاعدايلار جاتادى. مىنە وسىنداي جايت تۋىنداسا, جەدەل جاردەم تۇندەلەتىپ بارمايدى.

وزگەرىستىڭ 1, 2, 3 ساناتتاعى ناۋقاستاردىڭ شاقىرتۋىنا قاتىسى جوق, ولارعا تاۋلىك بويى قىزمەت كورسەتىلەدى.