Jedel járdem úıde qyzmet kórsetýdi toqtatpaıdy

Foto: ashyq derekkóz

Densaýlyq saqtaý mınıstrligi jedel járdem túngi shaqyrtýlarǵa barmaıdy degen jańalyqqa túsinikteme berdi, dep habarlaıdy qandastar.kz. Aıtýlarynsha, ózgerister kerisinshe qyzmet sapasyn jaqsartyp, naýqasqa tez jetý úshin jasalyp otyr. О́ıtkeni jedel járdem keshigip keledi degen shaǵym kóbeıgen.

Sondyqtan 4-shi sanattaǵy shaqyrtýlarǵa jedel járdem jumys kúnderi tańǵy saǵat 8:00-den keshki saǵat 18:00 barady, al senbide tańǵy 8:00-den 12:00-ge deıin qyzmet kórsetedi.

4-shi sanatqa qandaı jaǵdaılar kiredi? Adamnyń ómiri men densaýlyǵyna qaýip tóndirmeıtin (jiti nemese sozylmaly) aýrýlardyń órshýi, allergııalyq aýrýlar, jeńil jaraqattar (kúıikter, kógerýler), jándikterdiń shaǵýy, qusý, dene qyzýynyń kóterilýi sııaqty jaǵdaılar jatady. Mine osyndaı jaıt týyndasa, jedel járdem túndeletip barmaıdy.

О́zgeristiń 1, 2, 3 sanattaǵy naýqastardyń shaqyrtýyna qatysy joq, olarǵa táýlik boıy qyzmet kórsetiledi.