جاڭالىقتار
جەدەل جاردەمگە جول بەرەمىن دەپ سەرگەككە ءتۇسىپ قالسا: جۇرگىزۋشىلەر نە ىستەۋى كەرەك?
جەدەل جاردەمگە جول بەرۋ – مىندەتتى. الايدا, قازاقستاندىق جۇرگىزۋشىلەر, ەگەر شۇعىل قىزمەت كولىگىنە جول بەرگەن كەزدە, جول ەرەجەسىن بۇزۋعا تۋرا كەلسە, قالاي ارەكەت ەتۋ كەرەك ەكەنىن بىلمەي قالادى,-دەپ حابارلايدى Qandastar.kz
Sergek Group ءباسپاسوز قىزمەتى مالىمەتىنشە, «سەرگەك» قوعامدىق جانە جول قاۋىپسىزدىگى جۇيەسى بارلىق زاڭبۇزۋشىلىقتى تىركەيدى. الايدا, زاڭبۇزۋشىلىقتى راستاۋ نەمەسە قابىلداماۋ – بۇل شەشىم ۋاكىلەتتى قىزمەتكەر قۇزىرەتىندە. سوندىقتان كوبىنەسە مۇنداي ارەكەتتەر ءۇشىن ايىپپۇل كەلمەيدى.
«جۇيە ءاۆتوموبيلدىڭ مەملەكەتتىك ءنومىرىن تانيدى, زاڭبۇزۋشىلىق كارتوچكاسىن قالىپتاستىرادى جانە دەرەكتەردى ءاىجب پروتسەسسينگتىك ورتالىعىنا بەرەدى, وندا اقپاراتتىق بازالاردان قالعان مالىمەتتەر تارتىلادى. كەلەسى كەزەكتە زاڭبۇزۋشىلىق كارتاسى ۋاكىلەتتى قىزمەتكەرگە جىبەرىلەدى, ول ەتسق ارقىلى وسى بۇزۋشىلىقتى راستاۋى نەمەسە قابىلداماۋى كەرەك. تارتىپبۇزۋشىلىق كارتاسىنداعى جاعدايدى ناقتىراق باعالاۋ ءۇشىن بىرنەشە سۋرەتتەر مەن شولۋ ۆيدەوسى بولادى», – دەپ ءتۇسىندىردى Sergek Group.
الايدا, ەگەر ايىپپۇل كەلسە, پوليتسەيلەر قازاقستاندىقتارعا استانا پوليتسيا دەپارتامەنتىنىڭ اكىمشىلىك پوليتسيا باسقارماسىنا جۇگىنۋگە كەڭەس بەرەدى.
«ەگەر كولىك قۇرالىنىڭ جۇرگىزۋشىسى جول بەرىپ, وعان ايىپپۇل تولەۋ قاجەتتىگى تۋرالى نۇسقاما تۇسكەن جاعدايدا, قۇقىق بۇزۋشىلىق الىپ تاستالۋى كەرەك. ول ءۇشىن كولىك قۇرالدارىنىڭ يەلەرى جەتىگەن كوشەسى, 16 مەكەنجايى بويىنشا استانا پد اكىمشىلىك پوليتسيا باسقارماسىنا وتىنىشپەن جۇگىنۋى نەمەسە call-ورتالىققا: +7 7172 71 69 77, +7 7172 67 75 75 قوڭىراۋ شالۋى قاجەت, نەمەسە جازباشا وتىنىشپەن ە-ءوتىنىش ارقىلى جۇگىنۋگە بولادى», – دەپ جاۋاپ بەردى پد كوررەسپوندەنتتىڭ رەسمي سۇراۋىنا.
سونداي-اق, پوليتسيا جۇرگىزۋشىلەرگە ەسكەرتۋ شامدارى بار كولىكتەرگە ارقاشان جول بەرۋ كەرەك ەكەنىن ايتتى.
«اقبتك-ءنىڭ 598-بابىنا سايكەس ەسكەرتۋ شامدارى مەن ارنايى دىبىستىق سيگنال قوسىلعان كولىك قۇرالىنا قوزعالىستا ارتىقشىلىق بەرمەگەنى ءۇشىن 7 اەك مولشەرىندە ايىپپۇل كوزدەلگەن, ءبىر جىل ىشىندە قايتالاپ بۇزعان جاعدايدا, جازا قولدانىلعان ساتتەن باستاپ 15 اەك مولشەرىندە ايىپپۇل كوزدەلگەن», – دەپ تولىقتىردى قۇقىق قورعاۋ ورگاندارى.
