جەكە كۋالىك پەن تولقۇجاتتى ءموبيلدى قوسىمشالار ارقىلى ونلاين راسىمدەۋگە بولادى

قۇجاتقا سايكەس, جەكە كۋالىك پەن تولقۇجاتتى ەلەكتروندى ۇكىمەت پورتالى (eGov) جانە ءموبيلدى قوسىمشالار ارقىلى ونلاين اۋىستىرۋعا بولادى. بۇل قىزمەت تەك مەرزىمى وتكەن قۇجاتتارعا قولجەتىمدى بولماق.

قالاي ءوتىنىش بەرۋگە بولادى?

• قىزمەتتى تەك قۇجاتىنىڭ مەرزىمى 30 كۇننەن از ۋاقىت قالعان نەمەسە مەرزىمى 10 كۇننەن اسپاي ءوتىپ كەتكەن ازاماتتار پايدالانا الادى.
• ءوتىنىشتى ازامات ءوزى تولتىرادى.
• جۇيەگە ساپالى فوتوسۋرەت پەن قولتاڭبانى جۇكتەۋ قاجەت.
• ءوتىنىش وڭدەلگەن سوڭ, دايىن قۇجاتتى كوشى-قون قىزمەتىنىڭ ءتيىستى بولىمىنەن الۋعا بولادى.

ەگەر فوتوسۋرەت نەمەسە قولتاڭبا ساپاسىز بولسا نەمەسە قوسىمشا تەكسەرۋ قاجەت بولسا, ءوتىنىش كەرى قايتارىلادى. مۇنداي جاعدايدا ازامات جاڭا ءوتىنىش بەرۋى كەرەك جانە مەملەكەتتىك باج سالىعىن قايتا تولەۋگە تۋرا كەلەدى. ال بۇرىن تولەنگەن سوما سالىق كودەكسىنە سايكەس قايتارىلادى.

قۇجاتتى الۋ ءۇشىن ءوتىنىش بەرۋشى حقكو-عا (تسون) بارۋدىڭ قاجەتى جوق – دايىن قۇجاتتى ءتيىستى بولىمنەن الۋعا بولادى.

پيلوتتىق جوبا 2026 جىلدىڭ 31 ناۋرىزىنا دەيىن جالعاسادى. قازىرگى ۋاقىتتا جوبا «اشىق نقا» پورتالىندا قوعامدىق تالقىلاۋعا شىعارىلعان. ۇسىنىستار 2025 جىلدىڭ 19 ناۋرىزىنا دەيىن قابىلدانادى.

جوبانى ازىرلەۋشىلەردىڭ ايتۋىنشا, بۇل باستاما مەملەكەتتىك قىزمەتتەردى جەتىلدىرۋ, ازاماتتارعا ىڭعايلى قىزمەت كورسەتۋ جانە پروتسەستى وڭتايلاندىرۋ ماقساتىندا جاسالعان.