«جەكە ءومىرىمدى ءسوز ەتۋگە قاقىڭىز جوق»: تانىمال ادۆوكات جۋرناليست جىلقىشىبايدى سوتقا بەرەتىنىن ايتتى

بەلگىلى ادۆوكات ءلاززات احاتوۆا جۋرناليست نۇرسەيىت جىلقىشىبايدى سوتقا بەرەتىنىن مالىمدەدى, دەپ حابارلايدى qandastar.kz

ادۆوكات پاراقشاسىندا ءجۋرناليستىڭ مۇحامەدجان تازابەكپەن سۇحباتىندا ءوزى جايلى قوزعالعان اڭگىمەنى ءبولىستى. سۇحبات كەزىندە جىلقىشىباي تازابەككە «ستۋدەنت كەزىڭىزدە ءلاززات احاتوۆاعا عاشىق بولدىڭىز با? قازىر ول اجىراسىپ كەتكەن. قازىر ارتىنان جۇگىرمەسەڭىز دە, ءجيى سويلەسەدى ەكەنسىز. ءالى دە عاشىقسىز با? ۇرپاق ءوربىتۋ ماقساتىڭىز دا جوق پا?» دەپ سۇراق قويعان.

بۇل سۇراقتارعا تازابەك بارىنشا ۇستامدى جاۋاپ بەرگەن. بىراق ادۆوكات احاتوۆا ءۇنسىز قالمادى.

«نۇرسەيىت جىلقىشىباي, مىنا سۇراعىڭىز وتە ەرسى. مۇحامەدجان دۇرىس ايتادى, بىرگە وقىدىق. مەن ول كەزدە ۇزاتىلىپ كەتكەن, ءوز وتباسى بار ادام ەدىم. مۇحاڭمەن بىرگە وقىدى دەگەن اتىم بولماسا, كوپ تە ارالاسپاعانبىز. مەن تەك مۇحامەدجانمەن ەمەس, كۋرستاستاردىڭ دەنىمەن دوس رەتىندە ارالاسام. ول زاڭدى دا. قازىر اجىراسىپ كەتسەم, نەمەنە مىندەتتى تۇردە بىرگە وقىعان بىرەۋمەن ءجۇرۋ كەرەك پە? مەن قانشا جەردەن باسىم بوس بولسا دا, وتباسىلى ازاماتپەن بايلانىسقان ەمەسپىن, بايلانىسپايمىن دا. ءوزىمنىڭ وتباسىمنىڭ شىرقى سولاي بۇزىلىپ, شاڭىراعىم ورتاسىنا تۇسكەن سوڭ, ەشقاشان بىرەۋدىڭ ۇيىپ وتىرعان شاڭىراعىن بۇزبايمىن دا, وزىمدەي اناعا, ايەلگە تيتتەي دە زيانىمدى تيگىزبەيمىن. مەنىڭ ومىرلىك ءپرينتسيپىم سونداي. مەنىڭ جەكە ءومىرىمدى ءسوز ەتۋگە قاقىڭىز جوق! اجىراسسام, ەردەن اجىراسقان شىعارمىن, بىراق مەنىڭ التىنداي ۇل-قىزىم بار, جالعىز ەمەسپىن», — دەدى ادۆوكات.

Skifnews.kz اقپارات پورتالى جازعانداي,  ءلاززات احاتوۆا مۇحامەدجان تازابەكتى قاڭتاردان كەيىن ەموتسيامەن (مۇمكىن نەگىزسىز) كىنالاعان شىعارمىن دەپ ايتىپ, ءدىني سەنىمىنە كۇمان بولعان شىعار, بىراق قۇدايشىلىعىن ايتۋ كەرەك, ەشقاشان جالعىز ەكەن دەپ, باسىنعان, بوتەن اڭگىمە ايتقان كەزى بولماعانى ءۇشىن, تيتتەي دە ءبىر كوڭىلىمە كەلەتىن ارەكەت ەتپەگەنى ءۇشىن قۇرمەتتەيمىن دەدى.

«سوڭعى رەت بىلتىر سەرىكزات ۇشەۋمىز ورازانىڭ الدىندا, “كەرۋەندە” ءبىر مەيرامحانادا ءشاي ىشتىك, ودان كەيىن كەزدەسپەدىم. كەزدەسكەندە تەك ستۋدەنتتىك شاقتى ەسكە الامىز, ۇستازداردى ايتامىز, سول كەزدەگى بالالىقتاردى, قىزىقتاردى ايتامىز. ەشقانداي ساياسات, سەزىم, ماحاببات-ساحاببات دەگەن تەما بولمايدى. ويتكەنى, ءبارىمىز ەت پەن سۇيەكتەن جارالعان ادامبىز. ءبىر ءسات باياعى تاپ-تازا بالاڭ شاققا ورالعىمىز كەلەدى, سول كەزدىڭ كۋاسى بولعان جانداردى كورگەندە, ەرىكسىز سول الاڭسىز ءبارى جاقسى, ءبارى دوس كورىنەتىن, جانىمىز ءمولدىر, ەشقانداي اعىممەن, ساياساتپەن بىلعانباعان جاستىق شاققا ساياحات جاساپ, راحاتتانىپ ك ۇلىپ, تارقايمىز. بوتەن ءبىر نارسە ايتپايمىز. ءتىپتى قاڭتاردان سوڭ, نەشە ءتۇرلى نارسە جازىپ تاستاسام دا, سول كۇدىكتى سۇراعىمدى دا كورگەندە مۇحاڭنىڭ كوڭىلىنە قاراپ, مەن قويا المادىم. “ونىڭ نە, ءلاززات-اۋ, ابيتۋريەنت كەزدەن بىلەتىن دوس ەمەس پە ەدىك, وزىمنەن نەگە سۇرامادىڭ?”-دەپ, مۇحامەدجان دا ايىپتامادى. كوڭىلگە اۋىر تيەتىن تاقىرىپتى اينالىپ وتتىك. سەكەڭ دە ايتپادى. تەك ءوزارا جىگىتتەرمەن بولاتىن توبەلەستەردى, بوتەن فاكۋلتەتتىڭ قىزدارىنا بارىپ, بەلگىلى اقىننىڭ ولەڭىن ءوزىمنىڭ ولەڭىم دەپ وقىپ, “وبلوم” بولعان كەزدەردى ەسكە الىپ, ك ۇلىپ قايتتىق. ارقايسىمىز ءوز جولىمىزبەن, ءوز سەنىمىمىزبەن كەتسەك تە, بىزگە ورتاق ءبىر نارسە — ستۋدەنتتىك جىلدار, قارا شاڭىراق كازگۋ», — دەيدى ول.

ادۆوكات تازابەكپەن سويلەسەتىنىن ايەلى دە بىلەتىنىن, دوس رەتىندە سەنەتىنىن ايتتى.

«قازىرگىلەردى بىلمەيمىن, ءبىزدىڭ كەزدىڭ جىگىتتەرى وسىنداي! دوسقا دوس دەپ قارايدى, كوڭىلىڭە قاياۋ تۇسىرمەيدى, بوتەن ءسوز ايتپاق تۇگىلى, كوزىڭە تىكتەپ قارامايدى. ءبىزدىڭ ارامىزدا وسىنداي سىيلاستىق پەن قۇرمەت بار. ورىستاردا “كاجدىي پو سەبە سۋديت” دەگەن بار, باسى بوس ايەل كورسە بولدى, ارام ويلايتىنداردىڭ قىزدارىنا سونداي تاعدىر بەرسە عانا ويلانار, بالكىم.. ال مىنا سوزدەرىڭىز ۇيات بولدى, نۇرسەيىت ءىنىم.. رەيتينگ دەپ, شەكتەن شىعۋعا بولمايدى. 50-گە كەلگەن ادامداردا قايداعى ۇرپاق ءوربىتۋ?! ۇرپاعىمىزدى داۆنو ءوربىتىپ قويعانبىز, ءوز وتباسىمىزدا. ەندى نەمەرە سۇيەتىن جاستامىز», — دەيدى ول.

ەكىنشى جازباسىندا ادۆوكات وسى ءسوزى ءۇشىن ءجۋرناليستى سوتقا بەرەتىنىن مالىمدەدى.