جاڭالىقتار
جەكەمەنشىك بالاباقشا باسشىلارى جاۋاپقا تارتىلۋى مۇمكىن
فوتو: Pixabay
قازاقستاندا جەكەمەنشىك بالاباقشا باسشىلارىنا قاتىستى تالاپتار كۇشەيتىلەدى, دەپ حابارلايدى Qandastar.kz اقپارات پورتالى.
ەندى ساپاسىز قىزمەت كورسەتەتىن نەمەسە بالالارعا زورلىق-زومبىلىق كورسەتكەن پەداگوگتەردى جۇمىسقا قابىلداعان باسشىلار زاڭ الدىندا جاۋاپ بەرۋى مۇمكىن.
بۇل تۋرالى وقۋ-اعارتۋ ءمينيسترى عاني بەيسەمباەۆ مالىمدەدى. ءمينيستردىڭ ايتۋىنشا, ۆەدومستۆو تابىس تابۋدى كوزدەيتىن, الايدا قىزمەت ساپاسىنا كوڭىل بولمەيتىن ۇيىمداردىڭ جۇمىسىن شەكتەۋگە نيەتتى.
“جەكەمەنشىك بالاباقشالاردا تاربيەشىلەردىڭ بىلىكتىلىگىنە ءمان بەرمەيتىن جاعدايلار بار. مۇنداي ماسەلەلەردىڭ الدىن الۋ ءۇشىن باسشىلاردىڭ جاۋاپكەرشىلىگىن زاڭناما ارقىلى بەكىتۋ ۇسىنىلۋدا” – دەدى عاني بەيسەمباەۆ پارلامەنتتىڭ بىرلەسكەن وتىرىسىنان كەيىن.
ءمينيستردىڭ سوزىنشە, بارلىق قىزمەتكەردى قاداعالاۋ مۇمكىن ەمەس. سوندىقتان پەرسونال تاڭداۋدا سالعىرتتىق تانىتقان جەكەمەنشىك ۇيىم جەتەكشىلەرىن جاۋاپكەرشىلىككە تارتۋ – ماڭىزدى قادام. قازىرگى تاڭدا زاڭنامالىق وزگەرىستەر بويىنشا ۇسىنىستار ازىرلەنىپ جاتىر. ءتيىستى تۇزەتۋلەر پارلامەنت قاراۋىنا ۇسىنىلادى.
