جەلى بەلسەندىسى: اتتەستاتسيادان اقشا بەرىپ ءوتىپ, سەرتيفيكات العانداردىڭ QR كودى بازادا جوق بولىپ شىقتى

فوتو: inbusiness.kz

الەۋمەتتىك جەلىدە مۇعالىمدەردىڭ اتتەستاتسيادان اقشا بەرىپ, سەرتيفيكات العانى تۋرالى ايتىلىپ باستادى. قاي مۇعالىم, قاشان, قاي جەردە ونداي اتتەستاتسيا سەرتيفيكاتىن العانى تۋرالى ازىرگە ناقتى دەرەك جوق, — دەپ حابارلايدى Democrat.kz.

دەسەك تە, وسىنداي جازباعا بايلانىستى ۇستازدار قاۋىمىنىڭ جازعان پىكىرىنە قاراپ, اتتەستاتسيا دا جەمقورلاردىڭ جەمساۋى بولعانى ما دەگەن سۇراقتىڭ باسى قىلتيادى.

الەۋمەتتىك جەلى قولدانۋشى, بەلسەندى ازامات مەيرامبەك پازىلبەكوۆ “اتتەستاتسيانى “ساتىپ العان” ۇستازداردى قۇستىرىپ جاتىر ەكەن. سەرتيفيكاتتارىنىڭ QR كودى بازادا جوق بولىپ شىعىپتى. سوندايلار بالاعا ءبىلىم بەرەدى” دەگەن جازبا قالدىردى.

ال وسى ماسەلەگە بايلانىستى تانىمال ۇستاز ءومىر شىنىبەك ۇلى: “«ەشقاشان ەشكىمنەن ەشتەڭە سۇراما! اسىرەسە, وزىڭنەن كۇشتىلەردەن سۇراۋشى بولما! وزدەرى بارىنە ۇسىنادى, وزدەرى ءبارىن اكەپ بەرەدى!» بۋلگاكوۆتى وقىمايسىڭدار ما, ەۋ, #جالعان_پەداگوگتار سەندەردى قۇستىرۋ از…وقۋشىعا نە ۇلگى كورسەتتىڭدەر? سەندەردى ءبىلىم سالاسىنان قۋ كەرەك.. سوندا عانا وقۋشىلارعا ناعىز ءتالىم بەرىلەدى…” دەپ پىكىر ءبىلدىردى.

سونىمەن قاتار, وسى جازباعا وراي پىكىر بىلدىرگەن باسقا دا مۇعالىمدەر مەن قاراپايىم ازاماتتار مۇعالىمنىڭ اتتەستاتسيادان ءوز بىلىمىمەن وتكەنىن انىقتاپ, تەكسەرۋ كەرەگىن ايتۋدا. الايدا ءبىلىم سالاسىنداعى جەمقورلىققا باتقان وسى ءبىر اتتەستاتسيادان اقشامەن ءوتۋ پروبلەماسىنا قاتىستى بۇگىنگە دەيىن وقۋ اعارتۋ ءمينيسترى عاني بەيسەمباەۆ ءبىر اۋىز تۇسىنىك بەرمەدى.

ەستەرىڭىزدە بولسا, Democrat.kz. اقپاراتتىق پورتالى مۇعالىمنىڭ اتتەستاتسيادان اقشا بەرىپ وتەتىنى تۋرالى بىرنەشە رەت ماقالا جازدى. سونىمەن قاتار اتتەستاتسيا تالاپتارى بويىنشا مۇعالىم وتكىزۋگە ءتيىس اۆتورلىق باعدارلاما كىتاپشالارىنىڭ اشىق ساتىلىپ جاتقانىن دا ارنايى ماقالا ەتىپ جاريالاعانبىز.

وكىنىشكە قاراي, ءتيىستى مەكەمەلەر نازارعا الۋ بىلاي تۇرسىن, ءوزى باسقارىپ وتىرعان سالاداعى بىلىققا قاتىستى ءمينيستردىڭ دە ء“اۋ” دەمەۋى كوپ جايتتى راستاپ وتىرعانىن بىلدىرمەي مە?

ءبىلىم, بىلىگىن دالەلدەپ, بەلگىلى ءبىر ساناتقا قول جەتكىزۋ ءۇشىن وتەتىن سىناعىن تانىس-تامىر, پارا ارقىلى وتكەرىپ جاتسا, ونداي مۇعالىمنەن قانداي جەتىستىك كۇتەسىز? “ساتىپ الۋعا” دانىككەن مۇعالىم الدىندا وتىرعان وقۋشىعا نە ۇيرەتەدى? قانداي ءبىلىم بەرەدى?

سونداي “ساتىپ العىش” مۇعالىمدەردىڭ كەسىرىنەن ەمەس پە, ەلىمىزدەگى ءبىلىم ساپاسىنىڭ كۇرت تومەندەپ كەتۋى. سونداي ارسىز ارەكەتكە بارعان مۇعالىمنىڭ “ارقاسىندا” ساۋاتسىز ۇرپاق قوعامدى لاستاپ, ءبىلىم مەن عىلىم دامىماي وتىرعان جوق پا?

“قيت ەتسە, مۇعالىمگە تيىسەسىڭدەر!” دەپ جوق جەردەن بايبالام سالىپ, باجىلداپ شىعاتىن مۇعالىم كوبەيدى. ەلدىڭ ەرتەڭى — بۇگىنگى مۇعالىمنىڭ قولىندا. وسىنى ۇقپايتىن كەي مۇعالىمدەر “شەنەۋنىكتەردى تۇزەپ الىڭدار” دەپ ساندىراقتايدى.

سول شەنەۋنىكتى وقىتقان كىم? وسى سۇراقتىڭ جاۋابىن بىلمەيتىن مۇعالىمدەر شاعىمدانۋدى بىلەدى, سىناقتاردى ساتىپ الۋدى بىلەدى. وكىنىشكە قاراي, تۇتاس ەلدىڭ تامىرىنا بالتا شاۋىپ جاتقانىن بىلەتىن ساۋاتى جوق.

ءبىلىم سالاسىن ساۋاتسىز مۇعالىمنەن تازالايتىن ۋاقىت كەلدى. اتى-ءجونىن قاتەسىز جازا المايتىن مۇعالىمدەر “ساباق ءوتىپ, ءبىلىم بەرىپ” تايراڭداپ ءجۇر. ءبىلىمسىز مۇعالىم — قازاقستاننىڭ ەڭ باستى سورى. سوندىقتان دا وقۋ اعارتۋ ءمينيسترى سىناقتان اقشا بەرىپ وتكەندەردى انىقتاپ, قاتاڭ جازا بەرمەسە, ەلىمىزدىڭ ەرتەڭىنەن ەشتەڭە كۇتۋدىڭ قاجەتى جوق-اۋ…

حاقنازار سادىرحان,

Democrat.kz.