الەۋمەت جانە قوعام
جەلىدە ايسۇلتان نازارباەۆتىڭ ترامپقا قاتىستى پىكىرى قىزۋ تالقىلانىپ جاتىر
فوتو: اشىق دەرەككوز
جەلىدە ايسۇلتان نازارباەۆتىڭ ترامپقا قاتىستى پىكىرى قىزۋ تالقىلانىپ جاتىر, دەپ جازدى qandastar.kz
اق ءۇي باسشىسىنىڭ ءىس-ارەكەتى كۇن وتكەن سايىن تۇسىنىكسىز بولىپ بارادى. كۇنى كەشە ۋكراينا پرەزيدەنتى زەلەنسكيدى «كلوۋن» دەپ كەلەمەجدەگەن ترامپ ماسكەۋدىڭ ۇگىت-ناسيحاتىنا اربالىپ قالعان اسەر قالدىرۋدا.
وسى تۇستا جەلىدەگى جۇرت مارقۇم ايسۇلتان نازارباەۆتىڭ وسىدان ءتورت جىل بۇرىنعى جازباسىن ارحيۆتەن ارشىپ الىپ, قىزۋ تالقىلاۋ ۇستىندە.
اشكەرە تەلەگرام ارناسى حابارلاعانداي, ومىردەن وتەر الدىندا نازارباەۆتىڭ جيەنىندە كورىپكەلدىك قاسيەت پايدا بوپ, قازىرگى ۋاقىتتا شىندىققا اينالىپ جاتقان بىرقاتار جورامال جاساعان. ونىڭ «قازاقستاندا مۇزداي قارۋلانعان 400 سالافيت بار» دەگەن جازباسى قاڭتار كەزىندە ءىشىنارا راستالعان ەدى. كەشەلى بەرى ايسۇلتاننىڭ ترامپقا قاتىستى تۇسپالى قولدان-قولعا, اۋىزدان-اۋىزعا تاراپ جاتىر. «جالعىز دا حاق قۇداي وسى كۇندەرى اقش-تا بولىپ جاتقان جاعدايدى جەتكىزۋىمدى سۇرايدى. بۇل ءبىر قورقىنىشتى سوت, ءارى ول تەك باستاماسى عانا… بۇل – جالعىز دا حاق قۇدايدىڭ اقش-قا توككەن قاھارى, كەزىندە اراب كوكتەمى اياسىندا ۇيىمداستىرىلعان توڭكەرىستەردىڭ وتەۋى. يراك, ليۆيا, مىسىر, ءتۇنيس سەكىلدى ەلدەرگە كۇشپەن كيلىگۋ سالدارىنان قانشاما جازىقسىز جان قىرىلدى», – دەگەن ەدى ول. ايسۇلتان اتىشۋلى ترامپتىڭ بيلىككە قايتىپ ورالارىن دا ءدال بولجاعان.
«ترامپ ەكىنشى رەت پرەزيدەنت بولىپ سايلانادى, ءسويتىپ «امىريكادا دەموكراتيا جوق» ەكەنىن, بۇعان قاتىستى اڭگىمەنىڭ ءبارى جالعان ەكەنىن اشكەرەلەپ بەرەدى. ول جاقتا ءبارىن شەشەتىن اقشا! ولار حالىققا دەموكراتيا دەگەن يلليۋزيانى ءسىڭىرىپ, ونى بۇكىل الەمگە تىقپالاۋعا تىرىسادى. الگى ترامپ اقش تاريحىنداعى ەڭ سوڭعى پرەزيدەنت بولادى. 2024 جىلى امىريكانى انتيحريست (ىسلامداعى تاجال) جاۋلاپ الادى. قۇدىرەتتى دەرجاۆا گۇرس ەتىپ قۇلاعان كەزدە, كۇللى الەم ەسەڭگىرەپ قالادى», – دەگەن ەدى نازارباەۆتىڭ جيەنى.
ايسۇلتاننىڭ دەنەسى 2020 جىلى 16 تامىزدا لوندون ساياباعىنان تابىلعان.
مارقۇم قايتىس بولارىنان بۇرىن بىرقاتار اۋلەت وكىلدەرىنە شۇيلىگىپ, ولاردى «جەمقور», «اشكوز» دەپ ايىپتاعان ەدى.
