Áleýmet jáne qoǵam
Jelide Aısultan Nazarbaevtyń Trampqa qatysty pikiri qyzý talqylanyp jatyr
Foto: ashyq derekkóz
Jelide Aısultan Nazarbaevtyń Trampqa qatysty pikiri qyzý talqylanyp jatyr, dep jazdy qandastar.kz
Aq úı basshysynyń is-áreketi kún ótken saıyn túsiniksiz bolyp barady. Kúni keshe Ýkraına prezıdenti Zelenskııdi «kloýn» dep kelemejdegen Tramp Máskeýdiń úgit-nasıhatyna arbalyp qalǵan áser qaldyrýda.
Osy tusta jelidegi jurt marqum Aısultan Nazarbaevtyń osydan tórt jyl burynǵy jazbasyn arhıvten arshyp alyp, qyzý talqylaý ústinde.
Áshkere telegram arnasy habarlaǵandaı, ómirden óter aldynda Nazarbaevtyń jıeninde kóripkeldik qasıet paıda bop, qazirgi ýaqytta shyndyqqa aınalyp jatqan birqatar joramal jasaǵan. Onyń «Qazaqstanda muzdaı qarýlanǵan 400 salafıt bar» degen jazbasy Qańtar kezinde ishinara rastalǵan edi. Kesheli beri Aısultannyń Trampqa qatysty tuspaly qoldan-qolǵa, aýyzdan-aýyzǵa tarap jatyr. «Jalǵyz da haq Qudaı osy kúnderi AQSh-ta bolyp jatqan jaǵdaıdy jetkizýimdi suraıdy. Bul bir qorqynyshty sot, ári ol tek bastamasy ǵana… Bul – jalǵyz da haq Qudaıdyń AQSh-qa tókken qahary, kezinde Arab kóktemi aıasynda uıymdastyrylǵan tóńkeristerdiń óteýi. Irak, Lıvııa, Mysyr, Túnıs sekildi elderge kúshpen kıligý saldarynan qanshama jazyqsyz jan qyryldy», – degen edi ol. Aısultan atyshýly Tramptyń bılikke qaıtyp oralaryn da dál boljaǵan.
«Tramp ekinshi ret prezıdent bolyp saılanady, sóıtip «Ámirıkada demokratııa joq» ekenin, buǵan qatysty áńgimeniń bári jalǵan ekenin áshkerelep beredi. Ol jaqta bárin sheshetin aqsha! Olar halyqqa demokratııa degen ıllıýzııany sińirip, ony búkil álemge tyqpalaýǵa tyrysady. Álgi Tramp AQSh tarıhyndaǵy eń sońǵy prezıdent bolady. 2024 jyly Ámirıkany Antıhrıst (islamdaǵy Tajal) jaýlap alady. Qudiretti derjava gúrs etip qulaǵan kezde, kúlli álem eseńgirep qalady», – degen edi Nazarbaevtyń jıeni.
Aısultannyń denesi 2020 jyly 16 tamyzda London saıabaǵynan tabylǵan.
Marqum qaıtys bolarynan buryn birqatar áýlet ókilderine shúıligip, olardy «jemqor», «ashkóz» dep aıyptaǵan edi.
