Jelide habar tarady: «Mustafa Shoqaıdyń zıraty buzylǵaly jatyr»

Áleýmettik jelide osylaı dep úndeý tastaǵan oqyrman Berlındegi Mustafa Shoqaıdyń zıraty jýyq arada buzylatynyn aıtty, dep jazady qandastar.kz

Vıdeo avtorynyń aıtýynsha, Mustafa Shoqaı jerlengen qorymda sanaýly adamnyń ǵana zıraty qalǵan kórinedi.

«Qazaqstanǵa alyp ketińizder deıdi. Bul jerdiń bári buzylady eken. Alyp ketýge ruqsat, topyraǵymen birge» dep, sóleıdi vıdeo avtory. Vıdeonyń qaı ýaqytta túsirilgeni belgisiz.

Buǵan deıin de birneshe ret Shoqaı zıratynyń buzylatyny týraly aıtylǵan bolatyn, alaıda syrtqy ister mınıstrligi ondaı aqparatty teriske shyǵarǵan bolatyn.

«Áleýmettik jelide Berlındegi Mustafa Shoqaıdyń zıratyn buzyp, qıratyp, basqa jerge kóshirgeli jatqany týraly jalǵan aqparattar tarap jatyr. Bul aqparat rastalmaıdy. О́ıtkeni bizdiń Elshiliktiń qyzmetkeri dereý baryp, zırat qyzmetkerlerimen sóılesip, foto, vıdeoǵa túsirip, bárin óz kózimen kórip keldi. Mustafa Shoqaıdyń zıraty ornynda. Eshqaıda kóshirilmeıdi. Sondyqtan mundaı ótirik aqparat taratýdy toqtatý kerek», – dedi, 2023 jyly sol kezdegi SIM ókili Aıbek Smadııarov.