Jelide mıllıon teńgelik kýpıýralardyń vıdeosy qyzý talqyǵa tústi

Foto: Vıdeodan skrınshot

Jelide iri nomınaldaǵy kýpıýranyń paıda bolǵany týraly vıdeo tarap ketti. Ulttyq banktiń baspasóz qyzmeti buǵan qatysty pikir bildirdi. Bul týraly Stan.kz aqparat agenttigi habarlaıdy.

Qazaqstandyq jeli qoldanýshysy Azat Bekbolatov erekshe banknottar týraly vıdeo jarııalaǵan. 1 mıllıon teńgelik kýpıýra týraly vıdeo shamamen eki jarym mıllıonnan astam qaralym jınady.

«Dúkenge kirip, zat aldym, endi qalǵan aqshany birneshe apta kúttim», «Bul shynymen be?», «Eger shynymen de osyndaı aqsha bolsa, ekonomıka quldyrady degen sóz «, – dep jazdy jelidegiler.

Keıin Azat Bekbolatov bul vıdeony ázil retinde jarııalaǵanyn aıtty.

«Bul shyn kýpıýralar emes jáne olar tek oıynda qoldanylady. Árıne, olarmen eshkim tólemeıdi. Vıdeonyń astyna bul ótirik kýpıýra dep jazsam da, muny shyn dep qabyldaǵandar bolypty. Bul beınerolık osynshama talqylanady dep oılamadym», – deıdi Oral qalasynyń turǵyny.

Ulttyq banktiń baspasóz qyzmeti de vıdeodaǵy aqsha shynaıy banknot emes ekenin basa aıtty.

«Qazaqstan banknottarynyń serııasy men nomınaldary týraly barlyq aqparat Nationalbank.kz saıtynda qoljetimdi», – dedi UB baspasóz qyzmeti.