جەلىدە تانىسقان: پاۆلودار وبلىسىندا بەلگىسىز ەر ادام 13 جاستاعى قىزدى زورلاپ كەتتى

فوتو: اشىق دەرەككوز

پاۆلودار وبلىسىندا ەر ادام Telegram مەسسەندەرجەرى ارقىلى 13 جاستاعى قىزبەن سويلەسىپ, ارتىنشا زورلاپ كەتكەن. بۇل تۋرالى Stan.kz اقپارات اگەنتتىگى Kazinform باسىلىمىنا سىلتەمە جاساپ حابارلايدى.

وبلىستا ءجاسوسپىرىم قىزداردى جىنىستىق قاتىناسقا ماجبۇرلەۋدىڭ ءۇش بىردەي وقيعاسى كەيىنگى ءبىر اپتا كولەمىندە انىقتالىپ وتىر. ال, جىل باسىنان كامەلەت جاسىنا جەتپەگەندەردىڭ جىنىستىق قول سۇعىلماۋشىلىعىنا قارسى قىلمىستار بويىنشا 10 فاكتى بەلگىلى بولعان.

بۇل تۋرالى بالا قۇقىقتارى جونىندەگى وڭىرلىك ۋاكىل ساۋلە شاكەنوۆا حابارلادى.

«پاۆلودار وبلىسىندا كامەلەت جاسىنا تولماعان 13, 16 جانە 17 جاسار قىز بالالاردى زورلاۋ فاكتىسى راستالدى. العاشقىسى ەكىباستۇز قالاسىندا بولعان. ەر ادام Telegram مەسسەندەرجەرى ارقىلى قىزبەن سويلەسىپ, كەيىن ونىمەن كەزدەسىپ, ويىنداعى ز ۇلىم ارەكەتىن جۇزەگە اسىرعان. ال, 16 جانە 17 جاسار قىز بالالار وزگە وڭىرلەردە تۇرادى. ولار وزدەرىنىڭ زورلىق-زومبىلىقتىڭ قۇربانى بولعانى تۋرالى ەشكىمگە ءتىس جارماعان. بارلىعىمەن سويلەستىم. قىزداردىڭ ءبىرى بىرنەشە كۇن وتىرا الماعانىن مويىندادى. قولىن ۇستاعانىمدا دىرىلدەپ, كوز جاسىن توگىپ, جىلادى. مەن بۇل جاعدايعا ونىڭ كىنالى ەمەس ەكەنىن تۇسىندىرۋگە تىرىستىم” – دەدى ساۋلە شاكەنوۆا.

ستاتيستيكاعا قاراي, زورلىق-زومبىلىق جاسايتىندار كوبىنە ءوز اكەسى نەمەسە وگەي اكەسى, وتباسىنىڭ وزگە تۋىستارى, بىرگە تۇراتىندار, كورشىلەرى, وتباسىنىڭ دوستارى بولىپ شىعادى دەيدى ول.

ال, پاۆلودار وبلىسى پوليتسيا دەپارتامەنتى باستىعىنىڭ ورىنباسارى سافۋان جامپەيىسوۆ 16 جانە 17 جاستاعى قىزداردى زورلاۋ فاكتىسى بويىنشا ءبىر كۇدىكتى ازاماتتىڭ ۇستالعانىن مالىمدەدى.

«كامەلەتكە تولماعانداردى زورلاۋ فاكتىسى بويىنشا تەرگەۋ جۇرگىزىلىپ جاتىر. قاجەتتى ساراپتامالار تاعايىندالدى», – دەدى ول.

ەسكە سالساق, بۇعان دەيىن قىزىلوردادا 16 جاستاعى قىزدى سىنىپتاستارى جەزوكشەلىكپەن اينالىسۋعا ماجبۇرلەگەنى تۋرالى جازعان ەدىك.