جەلىنى شۋلاتقان الماتىلىق زەينەتكەرگە جاڭا ءۇي بەرىلدى

فوتو: ۆيدەودان كادر

65 جاستاعى ايساۋلە-اپا الەۋمەتتىك جەلىلەردە قىزۋ تالقىعا تۇسكەن بولاتىن. اجەيدىڭ الماتىداعى كوشەلەردىڭ ءبىرىن تازالىق بريگاداسىمەن جيناپ جۇرگەن ۆيدەوسى تاراعان ەدى. بۇگىندە الماتىلىق زەينەتكەرگە جاڭا ءۇي بەرىلدى, – دەپ حابارلايدى Massaget.kz تىلشىسى.

سول كۇننەن باستاپ ءبىر اپتا عانا وتسە دە, بۇل وتباسىنىڭ ءومىرى كۇرت وزگەردى. زەينەتكەردىڭ وقيعاسى قازاقستاندىقتاردى ءدۇر سىلكىندىردى, ەلىمىزدىڭ تۇكپىر-تۇكپىرىنەن كەلگەن ادامدار بۇل وتباسىنا كومەكتەسۋگە شەشىم قابىلدادى. اتاپ ايتقاندا, ايساۋلە-اپانىڭ نەسيەلەرى تولىعىمەن جابىلدى. سونداي-اق قايىرىمدىلىق قورىنان سىيلىق رەتىندە جاڭا ءۇي بەرىلدى.

وسى ۋاقىتقا دەيىن ايساۋلە-اپا, ونىڭ ۇلى مەن ايەلى جانە ولاردىڭ بەس بالاسى – شامالعان ستانتسياسىندا تۇردى. ولاردىڭ ايتۋىنشا, بۇل ءۇيدى نەسيەگە العان اقشاعا سالعان, بىراق تولىق تۇرعىزۋعا قاراجات جەتكىلىكسىز بولىپتى. سول ءۇشىن دارەتحانا سىرتتا, سۋ قۇبىرى جوق, جەر ەدەندە, قابىرعالارى جارىلعان ۇيدە تۇرىپ جاتتى. ستانتسيادا مەكتەپ بولماعاندىقتان, بالالار كۇن سايىن باسقا اۋىلعا وقۋعا بارۋعا ءماجبۇر بولدى. ال ولاردى تاسىمالداۋعا كوپ اقشا جۇمسالدى.

15 تامىزدا ايساۋلە-اپا وتباسىمەن بىرگە العاباس اۋدانىنداعى سىيعا تارتىلعان جاڭا ۇيگە كوشتى. مۇندا بالالار ءبىلىم الاتىن مەكتەپ بار.
مەنشىك يەسى قوردان حابارلاسىپ, ءۇيدى كىم ءۇشىن ساتىپ الاتىنىن ايتقان كەزدە ۇلكەن جەڭىلدىك جاسادى.

ايساۋلە-اپا ءۇيدىڭ كىلتىن العان كەزدە كوز جاسىنا ەرىك بەردى.
ءۇيدىڭ ءىشى بوس, ءالى بايلانىس جەلىسى ورناتىلماعان. دەگەنمەن, ءۇي جىلى, جاڭا جانە ىڭعايلى. ءتورت بولمەلى ۇيدە اس ءۇي جانە جۋىناتىن بولمە بار. قازىرگى تاڭدا جوندەۋ جۇمىستارى جۇرگىزىلىپ جاتىر. جيھازبەن, تەحنيكامەن جانە بايلانىس قۇرىلعىلارىن ورناتۋعا وزگە ادامدار دا كومەكتەسۋگە ۋادە بەردى.

جۋرناليستەرمەن اڭگىمە بارىسىندا ايساۋلە-اپا بۇدان بىلاي جۇمىس ىستەمەيتىنىن, نەسيە المايتىنىنا ۋادە بەردى.

«مەن ۇيدە بالالارمەن وتىرامىن, ال ۇلىم مەن كەلىنىم جۇمىس ىستەيدى», – دەدى ول.

ايساۋلە-اپانى الماتى كوشەلەرىندە جۇمىس ىستەپ جۇرگەن كەزىندە 20 جاستاعى جانسايا وعان بەي-جاي قاراماعان. قازاقستاندىقتاردىڭ بۇل قارياعا قامقور بولىپ, كومەك قولىن سوزۋىنا جانسايا سەبەپكەر بولدى.

«بىردە كوشەدە سىپىرۋشى بولىپ جۇمىس ىستەيتىن اجەمدى بايقادىم. ونىڭ جۇمىسى وتە قيىن بولدى. اياعى اقساپ, قوزعالۋى قيىنعا سوقتى. مەن ونى ايادىم. سوسىن دوستارىما وسىلاي جۇمىس ىستەيتىن ادامدار بار ەكەنىن كورسەتۋ ءۇشىن ۆيدەوعا ءتۇسىردىم. ال ءبىز , جاستار, كونديتسيونەر, تاماق – جاعدايى جاسالعان كەڭسەدە جۇمىستا وتىرىپ شاعىمدانامىز. كەيىن تۇسىرگەن ۆيدەونى TikTok جەلىسىنە جاريالادىم. وندا مەنىڭ 40-50 عانا وقىرمانىم بار ەدى, ونىڭ ءوزى تانىستارىم مەن دوستارىم عانا. بىراق ۆيدەو كوپكە تارالىپ, ءبىراز ادام اجەگە كومەكتەسۋگە قولداۋ بىلدىرە باستادى», – دەيدى جانسايا.

جانسايانىڭ ايساۋلە اپاعا جاناشىرلىعى الەۋمەتتىك جەلىلەردە ۆيدەو جاريالاۋمەن عانا شەكتەلمەگەن.

«وسى ۆيدەو تارالعاننان كەيىن كەيبىر جالعان اككاۋنتتاردىڭ ءوز پايداسى ءۇشىن قاراجات جيناي باستاعانىن كورىپ, مۇنى ءوزىم ۇيىمداستىرۋدى شەشتىم. جيناق كارتاسىن اشىپ, TikTok-تا رەكۆيزيتتەردى جاريالادىم. ادامدار قاراجات جىبەرە باستادى – بىرەۋ 150 تەڭگە, بىرەۋ 2000 تەڭگە. ناتيجەسىندە, ءبىز 815 000 تەڭگە جينادىق. اقشانى اجەگە بەرگەنىمدە, ول قاتتى قۋاندى جانە قۋانىشتان جىلاپ جىبەردى. وسى اقشاعا نەسيەنى جاۋىپ, ۇيدە دەمالاتىنىن ايتتى», – دەدى جانسايا.

جانسايا جاستارعا الەۋمەتتىك جەلىلەر تەك كوڭىل كوتەرۋ ءۇشىن عانا ەمەس, سونىمەن قاتار شىن مانىندە وسىنداي پايداسى بار ەكەنىن كورسەتكىسى كەلەتىنىن اتاپ ءوتتى.

«مەن مۇقتاج ادامدارعا كومەكتەسۋ تەك ترەند ەمەس, كەز كەلگەن جاستا جاساي الاتىن ماڭىزدى نارسە ەكەنىن كورسەتكىم كەلدى. جاستار كوبىنەسە ماعىناسى جوق ترەندتەردى ۇناتادى, مەن كۇش-جىگەرىمدى ناقتى كومەككە باعىتتاۋعا بولاتىندىعىن كورسەتكىم كەلدى. بۇگىن اجەگە ءۇي بەرىلگەندە, كوپتەن كۇتكەن ءۇمىتىمىزدىڭ, جۇمسالعان كۇش-جىگەرىمىزدىڭ اقتالعانىن سەزىندىم. بۇل جاي عانا قايىرىمدىلىق ارەكەتى ەمەس, ادامداردىڭ ءومىرىن جاقسى جاققا قالاي وزگەرتە الاتىنىمىزدىڭ ناقتى مىسالى بولدى», – دەپ قورىتىندىلادى ول.