جەم-ءشوپ تاپشى: باتىس قازاقستاندا توتەنشە جاعداي جاريالاندى

فوتو: istockphoto.com

باتىس قازاقستان وبلىسىنىڭ كەيبىر اۋداندارىندا جەرگىلىكتى ماڭىزى بار توتەنشە جاعداي جاريالاندى, دەپ حابارلادى qandastar.kz «24KZ» ارناسىنا سىلتەمە جاساپ.

توتەنشە جاعداي ايماعىنا جانىبەك, بوكەي ورداسى, جاڭاقالا مەن كازتالوۆ اۋداندارىنىڭ بىرنەشە اۋىلدارى كىردى. قۇرعاقشىلىق پەن اقبوكەندەردىڭ قاپتاپ كەتۋى سالدارىنان مال وسىرۋشىلەردىڭ مال ازىعىن جيناۋعا مۇمكىندىگى بولماي تۇر. نەگىزى باتىس قازاقستان وبلىسى مال شارۋاشىلىعىمەن اينالىسۋدا كوشباسشى ايماق. ءىرى قارا مالدىڭ سانى مۇندا ميلليوننان, ال ۇساق مالدىڭ سانى ەكى ميلليوننان اسادى. مال باسىنىڭ 70% وبلىستىڭ وڭتۇستىگىنە تيەسىلى.

«جەرگىلىكتى بيلىك پروبلەمالاردان حاباردار. «قازگيدرومەت» قورىتىندىسىنا سۇيەنە وتىرىپ, وڭىردە توتەنشە جاعداي رەجيمى ءىشىنارا جاريالاندى. سۋبسيديا رەتىندە ءىرى قارا مالدىڭ ءاربىر انالىق باسىنا 22 مىڭ تەڭگە تولەنەدى. ۇساق مال ءۇشىن ءۇش مىڭنان استام, ال بيە ءۇشىن 8 مىڭ تەڭگە. اۋىل شارۋاشىلىعى باسقارماسىنىڭ ەسەبى بويىنشا كومەكتىڭ جالپى سوماسى 3 ملرد 260 ملن تەڭگە بولادى», – دەلىنگەن حابارلامادا.

جەكە اۋلالارعا ءشوپ تاسىمالداۋ شىعىندارى وتەلەدى.