جاڭالىقتار
جەمقورلىققا قارسى سەريال تۇسىرەمىن دەگەن ساتباەۆ اكىمدىگىنىڭ باسى داۋعا قالدى
فوتو: اشىق دەرەككوز
جاقىندا مەملەكەتتىك ساتىپ الۋلار پورتالى ارقىلى ساتباەۆ اكىمدىگى 78,5 ملن تەڭگەگە الەۋمەتتىك سەريال ءتۇسىرۋ تۋرالى كەلىسىم-شارت جاساسقانى بەلگىلى بولدى. تاپسىرىس ءبىر كوزدەن, ەشقانداي كونكۋرسسىز «ErNar-Media» كومپانياسىنا بەرىلگەن, دەپ جازدى qandastar.kz
بۇل سەريال نەگىزىنەن جەمقورلىق پەن الاياقتىققا قارسى كۇرەستى ناسيحاتتاۋعا ءتيىس ەدى. بۇل تۋرالى مەملەكەتتىك ساتىپ الۋ تۋرالى زەرتتەيتىن Goszakupturaly ارناسى جازدى, دەپ حابارلايدى Dalanews.kz.
مالىمەتكە سۇيەنسەك, كەلىسىم-شارتتىڭ نەگىزى رەتىندە اكىمدىك «ينتەللەكتۋالدى مەنشىك» دەگەن سەبەپتى العا تارتقان. بۇل نەگىزدەمە مەملەكەتتىك ساتىپ الۋ پروتسەسىنىڭ جابىق, كۇماندى تۇردە وتۋىنە مۇمكىندىك بەرىپ وتىر. بىراق تاپسىرىس بەرۋشى ءدال قانداي ينتەللەكتۋالدى مەنشىك نىسانى ەكەنىن اشىپ كورسەتپەگەن.
«ErNar-Media» كومپانياسى مەملەكەتتىك ساتىپ الۋعا العاش رەت 2024 جىلى ناۋرىزدا قاتىسقان. وعان العاشقى تىكەلەي تاپسىرىستى ۇلىتاۋ وبلىسىنىڭ قوعامدىق دامۋ باسقارماسى بەرگەن. بۇل كومپانيانىڭ ديرەكتورى ەركەبۇلان مولداشەۆ – ۇلىتاۋ وبلىسى ءماسليحاتىنىڭ دەپۋتاتى, «AMANAT» پارتياسىنىڭ مۇشەسى», — دەپ جازىلعان اقپاراتتا.
2024 جىلى شىلدەدە ساتباەۆ قالاسىنىڭ اكىمى بولىپ مۇرات بورىباەۆ تاعايىندالدى. بۇعان دەيىن ول دا ۇلىتاۋ وبلىستىق ءماسليحاتىنىڭ دەپۋتاتى بولعان. دەرەككە سۇيەنسەك, سەريال تۇسىرەتىن كومپانيانىڭ باسشىسى مەن قالا اكىمى – بۇرىنعى ارىپتەستەر.
«ايتا كەتەرلىك تاعى ءبىر جايت – كومپانيانىڭ زاڭدى يەسى ەركەبۇلان مولداشەۆ ەمەس. ول تەك كومپانيا باسشىسى رەتىندە تىركەلگەن. كومپانيانىڭ قۇرىلتايشىسى – باسقا ادام. بىراق مەملەكەتتىك ساتىپ الۋ پورتالى بويىنشا بۇل قۇرىلتايشىنىڭ سەريال وندىرىسىمەن ەش قاتىسى جوق. ول بۇعان دەيىن جارىقتاندىرۋ, اعاش بۇيىمدارىن جاساۋ, مەكتەپ عيماراتىن جوندەۋ, ءتۇرلى تەحنيكالىق قۇرالداردى ساتۋمەن اينالىسقان. دەمەك كومپانيانىڭ يەسى مەن باسشىسىنىڭ اراسىندا ناقتى قانداي كەلىسىم بارى بەلگىسىز», — دەپ جازىلعان اقپاراتتا.
بۇل سەريال نەگە ءدال وسى كومپانياعا بەرىلگەنى جايلى اشىق اقپارات جوق. مۇنداي جاعداي, ارينە, قوعامدا ۇلكەن كۇدىك پەن ساۋال تۋعىزادى.
ەسكە سالايىق, بۇعان دەيىن باق-تا ساتباەۆتا دەپۋتاتتىڭ كومپانياسى سەريال تۇسىرۋگە 78,5 ملن تەڭگەلىك تەندەر ۇتىپ العانى تۋرالى اقپارات تارادى.
