Jemqorlyqqa qarsy serıal túsiremin degen Sátbaev ákimdiginiń basy daýǵa qaldy

Foto: ashyq derekkóz

Jaqynda memlekettik satyp alýlar portaly arqyly Sátbaev ákimdigi 78,5 mln teńgege áleýmettik serıal túsirý týraly kelisim-shart jasasqany belgili boldy. Tapsyrys bir kózden, eshqandaı konkýrssyz «ErNar-Media» kompanııasyna berilgen, dep jazdy qandastar.kz

Bul serıal negizinen jemqorlyq pen alaıaqtyqqa qarsy kúresti nasıhattaýǵa tıis edi. Bul týraly memlekettik satyp alý týraly zertteıtin Goszakupturaly arnasy jazdy, dep habarlaıdy Dalanews.kz.

Málimetke súıensek, kelisim-sharttyń negizi retinde ákimdik «ıntellektýaldy menshik» degen sebepti alǵa tartqan. Bul negizdeme memlekettik satyp alý proesiniń jabyq, kúmándi túrde ótýine múmkindik berip otyr. Biraq tapsyrys berýshi dál qandaı ıntellektýaldy menshik nysany ekenin ashyp kórsetpegen.

«ErNar-Media» kompanııasy memlekettik satyp alýǵa alǵash ret 2024 jyly naýryzda qatysqan. Oǵan alǵashqy tikeleı tapsyrysty Ulytaý oblysynyń Qoǵamdyq damý basqarmasy bergen. Bul kompanııanyń dırektory Erkebulan Moldashev – Ulytaý oblysy máslıhatynyń depýtaty, «AMANAT» partııasynyń múshesi», — dep jazylǵan aqparatta.

2024 jyly shildede Sátbaev qalasynyń ákimi bolyp Murat Bóribaev taǵaıyndaldy. Buǵan deıin ol da Ulytaý oblystyq máslıhatynyń depýtaty bolǵan. Derekke súıensek, serıal túsiretin kompanııanyń basshysy men qala ákimi – burynǵy áriptester.

«Aıta keterlik taǵy bir jaıt – kompanııanyń zańdy ıesi Erkebulan Moldashev emes. Ol tek kompanııa basshysy retinde tirkelgen. Kompanııanyń quryltaıshysy – basqa adam. Biraq memlekettik satyp alý portaly boıynsha bul quryltaıshynyń serıal óndirisimen esh qatysy joq. Ol buǵan deıin jaryqtandyrý, aǵash buıymdaryn jasaý, mektep ǵımaratyn jóndeý, túrli tehnıkalyq quraldardy satýmen aınalysqan. Demek kompanııanyń ıesi men basshysynyń arasynda naqty qandaı kelisim bary belgisiz», — dep jazylǵan aqparatta.

Bul serıal nege dál osy kompanııaǵa berilgeni jaıly ashyq aqparat joq. Mundaı jaǵdaı, árıne, qoǵamda úlken kúdik pen saýal týǵyzady.

Eske salaıyq, buǵan deıin BAQ-ta Sátbaevta depýtattyń kompanııasy serıal túsirýge 78,5 mln teńgelik tender utyp alǵany týraly aqparat tarady.