جەمقورلىقپەن اينالىسىپ ءجۇرسىڭ»: باقتيار ارتاەۆ وزىنە تاعىلعان جالاعا جاۋاپ بەردى

فوتو: prosports.kz

2004 جىلى افينادا وتكەن وليمپيادا ويىندارىنىڭ چەمپيونى باقتيار ارتاەۆ ASSYLTAS TV Youtube ارناسىنا بەرگەن سۇقباتىندا بوكس فەدەراتسياسىنىڭ ۆيتسە-پرەزيدەنتى بولعان شاعىنداعى وزىنە تاعىلعان سىندار تۋرالى ايتتى, دەپ حابارلايدى Skifnews.kz اقپارات پورتالى.

باقتيار ارتاەۆ 2021 جىلدىڭ ماۋسىم ايىنان 2022 جىلدىڭ اقپان ايىنا دەيىن قازاقستان بوكس فەدەراتسياسىنىڭ ۆيتسە-پرەزيدەنتى قىزمەتىن اتقارعان. وسى ۋاقىتتا باقتيار ارتاەۆقا قازاق بوكسىنداعى ساتسىزدىكتەر مەن جەڭىلىستەرگە بايلانىستى سىندار تاعىلعان بولاتىن, دەپ جازادى kaz.nur.kz.

«بوكس فەدەراتسياسىنىڭ ۆيتسە-پرەزيدەنتى قىزمەتىن اتقاردىم. سول ۋاقىتتا مەنىڭ تاراپىما نەبىر سوزدەر ايتىلدى. «وليمپيادادا نەگە قولا عانا الدىق? باقتيار سەن نە ىستەپ ءجۇرسىڭ? نە جەمقورلىقپەن اينالىسىپ ءجۇرسىڭ?», – دەدى.

بوكس فەدەراتسياسىنىڭ ۆيتسە-پرەزيدەنتى بولىپ جۇرگەنىمدە مەنىڭ الاتىن ايلىعىم 500 مىڭ تەڭگە بولدى. مەنىڭ ارتىق ەشقانداي قۇزىرەتتىلىگىم جوق. وقۋ-جاتتىعۋ جيىنىنا بارامىن, بوكسشىلاردىڭ جاتتىعۋلارىن باقىلايمىن, باپكەرلەردىڭ ىرىكتەلۋىنە ءمان بەرەمىن. مەنىڭ نەگىزگى قۇزىرەتتىلىگىم وسى ارنادا بولدى. وليمپيادا قارساڭىندا عانا تاعايىندالدىم. ال الەم چەمپيوناتىنا بارا جاتقان كەزدە مەن: «التىنسىز كەلسەم, ورنىمنان الىپ تاستاڭدار», – دەپ ۋادە ەتتىم. الەم بىرىنشىلىگىندە 2 التىن, 2 كۇمىس, 1 قولا الىپ كەلگەندە حالىق: ء«بىز مىقتى ەكەنبىز عوي», – دەدى. مەنىڭ دە بۇرىننان ايتىپ جۇرگەنىم – ءبىز بارىنەن مىقتىمىز. تەك ءار سالانىڭ شەنەۋنىكتەرى مەن مينيسترلەرى ءوز ىستەرىن ءسۇيىپ ىستەسە, ناتيجە بولادى. بۇل جەردە فەدەراتسيا باسشىلارى ەمەس, مينيستر قىزىعۋشىلىق تانىتۋى قاجەت. وسىنداي ماسەلەلەردى قولعا السا, سپورت رەتتەلەدى», – دەدى باقتيار ارتاەۆ.

ايتا كەتەلىك, فرانتسيا استاناسىندا وتەتىن وليمپيادا ويىندارىنا بوكستان قازاقستان ەرلەر قۇراماسى تولىق قۇرامدا قاتىسادى. بايراقتى باسەكەدە ەل نامىسىن ساكەن بيبوسىنوۆ (51 كگ), ماحمۇد سابىرحان (57 كگ), مۇحاممەدسابىر بازارباي ۇلى (63,5 كگ), اسلانبەك شىمبەرگەنوۆ (71 كگ), نۇربەك ورالباي (80 كگ), ايبەك ورالباي (92 كگ) جانە قامشىبەك قوڭقاباەۆ (92 كگ) قورعايدى.