جاڭالىقتار
«جەڭىلىپ قالعاننان كەيىن تۇرمىسقا شىعۋ ويىمنان اينىپ قالدىم»: ءابيبا وليمپيادادان جۇلدە الماي, تۇرمىسقا شىقپايتىنىن ايتتى
فوتو: جەكە پاراقشاسىنان
پاريج وليمپياداسىنىڭ قولا جۇلدەسى ءۇشىن تارتىستا جەڭىلىسكە ۇشىراعان ابيبا ابۋجاقىنوۆا سپورتتىق مانسابى مەن جەكە ومىرىنە قاتىستى جوسپارىن ايتتى.
SMARTNEWS.KZ باسىلىمىنىڭ حابارلاۋىنشا, پاريج وليمپياداسىندا جۇلدەگە سىنىق سۇيەم قالعاندا سۇرىنگەن ءابيبا ابۋجاقىنوۆا جۇلدەگەرلەر قاتارىنان كورىنگەندە مانسابىن اياقتاپ, وتباسى قۇرعىسى كەلگەنىن جاسىرمادى. بۇل تۋرالى Kazinform جازدى.
– دزيۋدودان قازاق قىزدارى اراسىندا مەن تۇڭعىش رەت الەم چەمپيوناتىنىڭ جۇلدەگەرى اتاندىم. وليمپيادا ويىندارىندا دا تۋرا سولاي العاشقى قازاق قىزى بولعىم كەلگەن. وكىنىشكە قاراي پاريجدە ول مۇمكىندىك ۇستاتپاي كەتتى. بىراق, ءبارى ءبىر سول ارمانعا, سول ماقساتقا قول جەتكىزبەي توقتامايمىن دەپ بەل بۋىپ وتىرمىن. لوس-اندجەلەستىڭ اۋىلى دا الىس ەمەس. انە-مىنە دەگەنشە ولدا كەلىپ قالادى. نەگىزى, وسى وليمپيادادا ارمانىم ورىندالعاندا مىندەتتى تۇردە بولاشاق جارىمدى تاۋىپ, تۇرمىسقا شىعىپ, بەسىگىمدى تەربەتىپ ۇيدە وتىرعىم كەلگەن. وسى جولى جەڭىلىپ قالعاننان كەيىن ول ويىمنان اينىپ قالدىم. قازىر جىگىتىم دە جوق. ەگەر مەنى ءتۇسىنىپ, 2028 جىلعى وليمپياداعا دەيىن كۇتەمىن دەگەن ازامات بولسا, تۇرمىسقا شىعۋعا دايىنمىن – دەدى دزيۋدوشى.
ايتا كەتەيىك, ءابيبا ابۋجاقىنوۆا پاريج وليمپياداسىنىڭ قولا جۇلدەسى ءۇشىن بەلدەسۋدە شۆەتسيالىق تارا بابۋلفاتتان جەڭىلىپ قالعان ەدى.
