«Jeńilip qalǵannan keıin turmysqa shyǵý oıymnan aınyp qaldym»: Ábıba olımpıadadan júlde almaı, turmysqa shyqpaıtynyn aıtty

Foto: jeke paraqshasynan

Parıj olımpıadasynyń qola júldesi úshin tartysta jeńiliske ushyraǵan Abıba Abýjaqynova sporttyq mansaby men jeke ómirine qatysty josparyn aıtty.

SMARTNEWS.KZ basylymynyń habarlaýynsha, Parıj olımpıadasynda júldege synyq súıem qalǵanda súringen Ábıba Abýjaqynova júldegerler qatarynan kóringende mansabyn aıaqtap, otbasy qurǵysy kelgenin jasyrmady. Bul týraly Kazinform jazdy.

– Dzıýdodan qazaq qyzdary arasynda men tuńǵysh ret álem chempıonatynyń júldegeri atandym. Olımpıada oıyndarynda da týra solaı alǵashqy qazaq qyzy bolǵym kelgen. О́kinishke qaraı Parıjde ol múmkindik ustatpaı ketti. Biraq, bári bir sol armanǵa, sol maqsatqa qol jetkizbeı toqtamaımyn dep bel býyp otyrmyn. Los-Andjelestiń aýyly da alys emes. Áne-mine degenshe olda kelip qalady. Negizi, osy olımpıadada armanym oryndalǵanda mindetti túrde bolashaq jarymdy taýyp, turmysqa shyǵyp, besigimdi terbetip úıde otyrǵym kelgen. Osy joly jeńilip qalǵannan keıin ol oıymnan aınyp qaldym. Qazir jigitim de joq. Eger meni túsinip, 2028 jylǵy olımpıadaǵa deıin kútemin degen azamat bolsa, turmysqa shyǵýǵa daıynmyn – dedi dzıýdoshy.

Aıta keteıik, Ábıba Abýjaqynova Parıj olımpıadasynyń qola júldesi úshin beldesýde shveııalyq Tara Babýlfattan jeńilip qalǵan edi.