جاڭالىقتار
جەڭىستىڭ 80 جىلدىعىنا وراي 4 مىڭ اسكەري قىزمەتكەر پارادقا قاتىسادى
فوتو:gov.kz
قازاقستاندىق بۇقارالىق اقپارات قۇرالدارىنا ۇلى وتان سوعىسىنداعى جەڭىستىڭ 80 جىلدىعىنا ارنالعان شەرۋگە دايىندىقتىڭ بارىسى كورسەتىلدى, دەپ جازدى qandastar.kz
پارادتىق ەسەپتوپتاردىڭ نەگىزىن قازاقستان رەسپۋبليكاسى قارۋلى كۇشتەرىنىڭ قۇرلىق اسكەرلەرى قۇرايدى. سالتاناتتى شەرۋگە مەملەكەتتىك كۇزەت قىزمەتىنىڭ, ءىىم ۇلتتىق ۇلانىنىڭ, ۇقك شەكارا قىزمەتىنىڭ, توتەنشە جاعدايلار مينيسترلىگىنىڭ ەسەپتوپتارى دا قاتىسادى.
– شەرۋگە قاتىسۋشىلاردى ىرىكتەۋ كەزىندە بارىنە بىردەي دەنە دايىندىعى, دەنساۋلىق جاعدايى, بويى بويىنشا قاتاڭ تالاپتار قويىلدى. بارلىق اسكەري قىزمەتشىلەردىڭ بويىنشا قارۋلى كۇشتەرگە دەگەن ماقتانىشقا نەگىزدەلگەن جوعارى موتيۆاتسيا بار, – دەدى قۇرلىق اسكەرلەرىنىڭ باس قولباسشىسى گەنەرال-مايور مەرەكە كوشەكباەۆ.
سونداي-اق جۋرناليستەرگە اسكەري قىزمەتكەرلەر تۇراتىن شاتىرلى قالاشىق, شارۋاشىلىق جابدىقتاۋ پۋنكتەرى, دالالىق گوسپيتال كورسەتىلدى.
تەحنيكالىق ايماقتا قوناقتارعا سوعىس جىلدارىنداعى تەحنيكا مەن زاماناۋي جاۋىنگەرلىك ماشينالاردى پارادقا دايىندايتىن مامانداردى كورۋگە دە مۇمكىندىك بەرىلدى.
ءىس-شارا جاۋىنگەرلىك تەحنيكا لەگىنىڭ وتۋمەن اياقتالدى. ولاردىڭ قاتارىندا ايگىلى ت-34 تانكتەرى جانە زيس-2 (كاليبرى 57 مم) زەڭبىرەكتەرى بار زيل-157, م-30 (كاليبرى 122 مم) گاۋبيتسالارى بار زيل-157, ەسەپتوپتارىمەن بم-13 «كاتيۋشا» اۆتوموبيلدەرى بار. شەرۋدىڭ قازىرگى بولىگىندە ەلىمىزدىڭ باس الاڭى بويىنشا «ارلان», «Cobra» ساۋىتتى دوڭگەلەكتى ماشينالارى, «سترەلا-10», «تور» جانە «بۋك» زەنيتتىك زىمىران كەشەندەرى, بتر-82ا, «الماز» جانە «اگات» ءموبيلدى كەشەندەرى, «TEODor» روبوتەحنيكالىق كەشەنى, ەسەپتىك-تالدامالىق ستانتسيا كەشەنى جانە قارۋ-جاراق پەن اسكەري تەحنيكانىڭ باسقا دا جوعارى تەحنولوگيالىق ۇلگىلەرى ءجۇرىپ وتەدى.
ەستەرىڭىزگە سالا كەتەيىك, ۇلى وتان سوعىسىنداعى جەڭىستىڭ 80 جىلدىعى مەن وتان قورعاۋشىلار كۇنىنە ارنالعان اسكەري شەرۋ ءداستۇرلى تۇردە 7 مامىردا استانادا وتەدى. وعان 4000-نان استام اسكەري قىزمەتشى, 300-دەن استام قارۋ-جاراق پەن اسكەري تەحنيكا قاتىسادى. شەرۋدىڭ اۋە بولىگىن مايداندىق, ارميالىق جانە اسكەري-كولىكتىك اۆياتسيانىڭ 66 ۇشۋ اپپاراتى قۇرايدى.
