جاڭالىقتار
جەڭىستىڭ 80 جىلدىعىنا وراي سوعىس ارداگەرلەرىنە 5 ملن تەڭگە بەرىلەدى
فوتو: اشىق دەرەككوز
ۇلى وتان سوعىسىنداعى جەڭىستىڭ 80 جىلدىعىن مەرەكەلەۋ اياسىندا ۇوس ارداگەرلەرىنە 5 ملن تەڭگە كولەمىندە بىرجولعى ماتەريالدىق كومەك تولەۋ جوسپارلانىپ وتىر, دەپ جازدى qandastar.kz
قازاقستاندا 2025 جىلعى 20 قاڭتارداعى جاعداي بويىنشا ۇلى وتان سوعىسىنىڭ (بۇدان ءارى – ۇوس) 120 ارداگەرى, سونداي-اق ۇوس جەڭىسىنە ۇلەس قوسقان 42 545 ازامات تۇرادى. ولاردىڭ ىشىندە: قورشاۋداعى لەنينگراد تۇرعىندارى – 67 ادام; كونتسلاگەرلەردىڭ بۇرىنعى كامەلەتكە تولماعان تۇتقىندارى – 139 ادام; ۇوس كەزىندە العان جارالانۋى, كونتۋزياسى, زاقىمدانۋى نەمەسە اۋرۋى سالدارىنان مۇگەدەكتىگى بار قايتىس بولعان ادامنىڭ جۇبايلارى – 743 ادام; ۇوس-تا قازا تاپقان (قايتىس بولعان, حابار-وشارسىز كەتكەن) جاۋىنگەرلەردىڭ جەسىرلەرى – 2 ادام; تىل ەڭبەككەرلەرى – 41 594 ادام.
ارداگەرلەر مەن تىل ەڭبەككەرلەرىنە قامقورلىق جاساۋ, ولاردىڭ ءومىر ءسۇرۋ ساپاسىن ارتتىرۋ – مەملەكەتتىڭ الەۋمەتتىك ساياساتىنىڭ باستى باسىمدىقتارىنىڭ ءبىرى بولىپ تابىلادى. قارتتاردى الەۋمەتتىك قورعاۋ شارالارى ورتالىق دەڭگەيدە دە, جەرگىلىكتى دەڭگەيدە دە جۇزەگە اسىرىلادى.
بىرىنشىدەن, زەينەتاقى جانە وزگە دە الەۋمەتتىك تولەمدەردىڭ مولشەرى جىل سايىن ارتىپ كەلەدى. ازاماتتاردىڭ 19 ساناتىنا (سوعىسقا قاتىسۋشىلار, تىل ەڭبەككەرلەرى, اقتالعان ازاماتتار جانە ت.ب.) وزگە دە الەۋمەتتىك تولەمدەرگە قاراماستان ارناۋلى مەملەكەتتىك جاردەماقى تولەۋ جۇزەگە اسىرىلادى.
2025 جىلعى 1 قاڭتارداعى جاعداي بويىنشا ۇوس قاتىسۋشىلارى ءۇشىن زەينەتاقىلاردى ەسكەرە وتىرىپ, اي سايىن الىناتىن الەۋمەتتىك تولەمدەردىڭ جيىنتىق مولشەرى 262 334 تەڭگەنى جانە ۇوس كەزەڭىندە العان جارالانۋى, كونتۋزيا الۋى, مەرتىگۋى نەمەسە اۋرۋى سالدارىنان مۇگەدەكتىگى بار ادامدار ءۇشىن – 279 330 تەڭگەنى قۇرادى.
ەكىنشىدەن, ارداگەرلەردى الەۋمەتتىك قولداۋدىڭ قوسىمشا شارالارى كورسەتىلەدى. ولاردىڭ بارلىعى اسكەري قىزمەتشىلەرگە كورسەتىلەتىن قۇقىقتار مەن كەپىلدىكتەرگە يە. سالىق سالۋ بويىنشا جەڭىلدىكتەردى پايدالانادى, ولارعا استانا جانە الماتى قالالارىنداعى مامانداندىرىلعان گوسپيتالداردا بىلىكتى مەديتسينالىق كومەك كورسەتىلەدى, ساناتوري-كۋرورتتىق ەمدەۋ ۇسىنىلادى.
ۇشىنشىدەن, ۇوس ارداگەرلەرىنە بىرجولعى ماتەريالدىق كومەك بەرۋ جىل سايىنعى داستۇرگە اينالدى.
وبلىستاردىڭ, استانانىڭ جانە رەسپۋبليكالىق ماڭىزى بار قالالاردىڭ جەرگىلىكتى اتقارۋشى ورگاندارىنىڭ اقپاراتى بويىنشا جەڭىس كۇنىنىڭ 80 جىلدىعىن مەرەكەلەۋ قۇرمەتىنە بيىل 120 ۇوس ارداگەرىنىڭ ارقايسىسىنا 5 ملن تەڭگەدەن بىرجولعى ماتەريالدىق كومەك كورسەتىلەتىن بولادى.
ايتا كەتەيىك, بيىل استانادا جەڭىستىڭ 80 جىلدىعىنا وراي اسكەري شەرۋ وتەدى.
