Jeńistiń 80 jyldyǵyna oraı soǵys ardagerlerine 5 mln teńge beriledi

Foto: ashyq derekkóz

Uly Otan soǵysyndaǵy Jeńistiń 80 jyldyǵyn merekeleý aıasynda UOS ardagerlerine 5 mln teńge kóleminde birjolǵy materıaldyq kómek tóleý josparlanyp otyr, dep jazdy qandastar.kz

Qazaqstanda 2025 jylǵy 20 qańtardaǵy jaǵdaı boıynsha Uly Otan soǵysynyń (budan ári – UOS) 120 ardageri, sondaı-aq UOS jeńisine úles qosqan 42 545 azamat turady. Olardyń ishinde: qorshaýdaǵy Lenıngrad turǵyndary – 67 adam; konlagerlerdiń burynǵy kámeletke tolmaǵan tutqyndary – 139 adam; UOS kezinde alǵan jaralanýy, kontýzııasy, zaqymdanýy nemese aýrýy saldarynan múgedektigi bar qaıtys bolǵan adamnyń jubaılary – 743 adam; UOS-ta qaza tapqan (qaıtys bolǵan, habar-osharsyz ketken) jaýyngerlerdiń jesirleri – 2 adam; tyl eńbekkerleri – 41 594 adam.

Ardagerler men tyl eńbekkerlerine qamqorlyq jasaý, olardyń ómir súrý sapasyn arttyrý – memlekettiń áleýmettik saıasatynyń basty basymdyqtarynyń biri bolyp tabylady. Qarttardy áleýmettik qorǵaý sharalary ortalyq deńgeıde de, jergilikti deńgeıde de júzege asyrylady.

Birinshiden, zeınetaqy jáne ózge de áleýmettik tólemderdiń mólsheri jyl saıyn artyp keledi. Azamattardyń 19 sanatyna (soǵysqa qatysýshylar, tyl eńbekkerleri, aqtalǵan azamattar jáne t.b.) ózge de áleýmettik tólemderge qaramastan arnaýly memlekettik járdemaqy tóleý júzege asyrylady.

2025 jylǵy 1 qańtardaǵy jaǵdaı boıynsha UOS qatysýshylary úshin zeınetaqylardy eskere otyryp, aı saıyn alynatyn áleýmettik tólemderdiń jıyntyq mólsheri 262 334 teńgeni jáne UOS kezeńinde alǵan jaralanýy, kontýzııa alýy, mertigýi nemese aýrýy saldarynan múgedektigi bar adamdar úshin – 279 330 teńgeni qurady.

Ekinshiden, ardagerlerdi áleýmettik qoldaýdyń qosymsha sharalary kórsetiledi. Olardyń barlyǵy áskerı qyzmetshilerge kórsetiletin quqyqtar men kepildikterge ıe. Salyq salý boıynsha jeńildikterdi paıdalanady, olarǵa Astana jáne Almaty qalalaryndaǵy mamandandyrylǵan gospıtaldarda bilikti medıınalyq kómek kórsetiledi, sanatorıı-kýrorttyq emdeý usynylady.

Úshinshiden, UOS ardagerlerine birjolǵy materıaldyq kómek berý jyl saıynǵy dástúrge aınaldy.

Oblystardyń, astananyń jáne respýblıkalyq mańyzy bar qalalardyń jergilikti atqarýshy organdarynyń aqparaty boıynsha Jeńis kúniniń 80 jyldyǵyn merekeleý qurmetine bıyl 120 UOS ardageriniń árqaısysyna 5 mln teńgeden birjolǵy materıaldyq kómek kórsetiletin bolady.

Aıta keteıik, bıyl Astanada Jeńistiń 80 jyldyǵyna oraı áskerı sherý ótedi.