جاڭالىقتار
جەر تەلىمى بۇيىرۋى عاجاپ ەمەس: بولات نازارباەۆتىڭ مۇراسىنا كىم تالاسپاق?
فوتو: اشىق دەرەككوز
ەكس-پرەزيدەنت نۇرسۇلتان نازارباەۆتىڭ ءىنىسى بولات نازارباەۆ قايتىس بولعاننان كەيىن كوپ ۇزاماي ونىڭ مۇلكىنە تالاس باستالىپ كەتكەن-ءدى. نوتاريۋسقا بارىپ, مۇراگەرلىك قۇقىعىن جاريالاعاندار تىزىمدە «ەڭ باي سانتەحنيك» اتانعان بولات نازارباەۆتىڭ كوز جۇمعان ساتىندەگى زاڭدى ايەلى دينارا مامەتەكوۆا مەن 14 بالاسى بار, دەپ حابارلايدى Qandastar.kz @yyedilov كانالىنا سىلتەمە جاساپ.
ازىرگە رەسمي تىركەلگەن مۇراگەرلەردىڭ سانى وسىنشاما. الايدا ونىڭ سانى بۇدان دا ءوسۋى عاجاپ ەمەس. سەبەبى, قاراپايىم سانتەحنيكتەن ميللياردەرگە دەيىن وسكەن مارقۇمنىڭ قازاقستاندا دا, باسقا مەملەكەتتە دە داۋلەتى بولعانى ەشكىمگە قۇپيا ەمەس.
بولات نازارباەۆتىڭ 36 جاستاعى ايەلى دينارا مارقۇم كۇيەۋىنىڭ بالالارىنىڭ سانى 20-عا جۋىقتايتىنىن ايتقان. ول كۇيەۋىنىڭ كوبىسىن ۇمىتىپ قالعانىن دا جەتكىزگەن. الايدا ارقايسىنىڭ اتىن, ءتىپتى تۋعان كۇنىنە دەيىن جازىپ العانىن ايتتى.
ايتا كەتەيىك, بولات نازارباەۆ مۇراسىنىڭ ەڭ قوماقتى بولىگىنە نۇربول نازارباەۆ يە. الايدا ءبىراز اكتيۆتىڭ كەزىندە زاڭسىز قولدى بولعانى دالەلدەنىپ, مارقۇمنىڭ ءبىراز مۇلكى مەملەكەتكە قايتارىلۋدا. سوندىقتان مۇراگەرلەرگە جەر تەلىمى, نە ءۇي عانا بۇيىرىپ قالۋى عاجاپ ەمەس.
