جەتىسۋ وبلىسىنىڭ كوكسۋ اۋىلىندا اۋتيزممەن اۋىراتىن بالا 3 كۇننەن بەرى تابىلماي جاتىر

فوتو: ۆيدەودان سكرينشوت

جەتىسۋ وبلىسىنىڭ كوكسۋ اۋىلىندا اۋتيزمگە شالدىققان ەرەكشە بالا جوعالىپ كەتتى. ەسىك الدىندا ويناپ جۇرگەن ءۇش جاسار الديار كوشەگە شىعىپ كەتكەن, سودان بەرى ءۇش كۇن ءوتتى. ىزدەستىرۋ جۇمىستارىنا باس-اياعى 400 ادام جۇمىلعان. قازىر سۇڭگۋىرلەر ەلدىمەكەندەگى اعىسى قاتتى وزەندى سۇزۋگە كىرىسكەن. بۇل تۋرالى qandastar.kz 31-ارنانىڭ ينفورمبيۋرو جاڭالىقتار باعدارلاماسىنا سىلتەمە جاساپ حابارلايدى.

ءۇش جاستان ەندى اسقان الديار وتباسىنداعى توعىز بالانىڭ جەتىنشىسى. مىنەزى تۇيىق, ەرەكشە ءبۇلدىرشىن باۋىرلارىنا قوسىلماي, جالعىز جۇرگەندى ۇناتادى ەكەن. 7 قىركۇيەكتە كۇندىز ءبارى اۋلادا ويناپ جۇرگەندە, اناسى 15 مينۋتقا اس ۇيگە كىرىپ كەتىپتى. سول ارالىقتا بالاسىنان كوز جازىپ قالعان.

“بۇگىن – ءۇشىنشى كۇن. نە ويلارىمدى دا بىلمەيمىن. جۇرەگىم تابىلادى دەيدى, جۇرەگىم تىپ-تىنىش, تابىلادى دەگەن سەنىممەن اياققا تۇرمىز. ەل-جۇرت قاراپ جاتىر. تابىلىپ قالادى دەگەن ۇمىتتەمىن”, – دەيدى الدياردىڭ اناسى اينۇر بەكجانوۆا.

اۋىل تۇرعىندارى دا بالانىڭ ىزدەستىرۋ جۇمىستارىنا اتسالىسىپ ءجۇر. بىراق وكىنىشتىسى, بالا ءالى تابىلماي جاتىر.

– بىرەۋلەر الىپ كەتتى مە دەگەن بولجام بار, سۋعا ءتۇسىپ كەتتى مە دەگەن بولجام بار. ءۇيدىڭ ماڭايىندا شۇڭقىردا جاتىر ما دەپ ىزدەدىك, سومەن تابا الماي جاتىرمىز. بۇرىن اۋىلىمىزدان ەشتەڭە جوعالىپ كورگەن جوق. مالىمىز دا جوعالىپ كورگەن جوق, تىنىش اۋىل بولاتىن, – دەيدى كوكسۋ اۋىلىنىڭ تۇرعىندارى مەيراش شامشاروۆا.

جەدەل ىزدەستىرۋ توبى, اۋىل حالقى مەن ەرىكتىلەر تاباندارىنان تاۋسىلىپ ءۇش كۇننەن بەرى ءار ءۇيدىڭ اۋلاسىن, قورا-قوپسىسىن تۇگەل قاراپ شىققان. ءۇيدىڭ ىرگەسىندە اعىنى قاتتى وزەن بار. سەنبى كۇنى بالانى سول ماڭنان كورگەندەر دە بولعان ەكەن. سوندىقتان مۇقانشى سۋ ايدىنىن ءسۇزىپ شىعۋ ءۇشىن سۇڭگۋىرلەر شاقىرتىلعان ەكەن.

قۇزىرلى ورگان وكىلدەرى تاۋلىك بويى تىنىم تاپپاي, الدياردى ءالى دە ىزدەيمىز دەپ وتىر. ال بالا ۇيدەن شىعىپ كەتكەندە ۇستىنە سۇر جەمپىر, قارا شالبار كيگەن. اياق كيىمى اق ءتۇستى. پوليتسيا كىشكەنتاي ءبۇلدىرشىندى كورگەن-بىلگەندەر بولسا, 102 نومىرىنە حابارلاسۋدى سۇرايدى.

– ىزدەستىرۋ جۇمىسىنا 400-گە جۋىق ادام قاتىستى. شۇڭقىرلار بار ما, شاتىرلار, دارەتحانالاردىڭ تەسىكتەرىن ءبارىن تۇگەلدەي ءۇيدىڭ ءىشىن تەكسەرۋ جۇمىستارىن جۇرگىزدىك. ودان كەيىن وسى اۋىلدىڭ جان جاعىنداعى جابايى وسكەن اعاشتار, جىڭعىل, ەگىستىك جەرلەر سونىڭ ءبارىن ىزدەستىرۋ جۇمىستارىن جۇرگىزدىك. سۋدىڭ ىشىندە دە ىزدەستىرۋ ناتيجەلەرىن جالعاستىرۋدامىز, – دەدى جەتىسۋ وبلىستىق پوليتسيا دەپارتامەنتى جەرگىلىكتى پوليتسيا قىزمەتىنىڭ باستىعى قايسار مۇحمەتوۆ.