Jetisý oblysynyń Kóksý aýylynda aýtızmmen aýyratyn bala 3 kúnnen beri tabylmaı jatyr

Foto: Vıdeodan skrınshot

Jetisý oblysynyń Kóksý aýylynda aýtızmge shaldyqqan erekshe bala joǵalyp ketti. Esik aldynda oınap júrgen úsh jasar Aldııar kóshege shyǵyp ketken, sodan beri úsh kún ótti. Izdestirý jumystaryna bas-aıaǵy 400 adam jumylǵan. Qazir súńgýirler eldimekendegi aǵysy qatty ózendi súzýge kirisken. Bul týraly qandastar.kz 31-arnanyń Informbıýro jańalyqtar baǵdarlamasyna silteme jasap habarlaıdy.

Úsh jastan endi asqan Aldııar otbasyndaǵy toǵyz balanyń jetinshisi. Minezi tuıyq, erekshe búldirshin baýyrlaryna qosylmaı, jalǵyz júrgendi unatady eken. 7 qyrkúıekte kúndiz bári aýlada oınap júrgende, anasy 15 mınýtqa as úıge kirip ketipti. Sol aralyqta balasynan kóz jazyp qalǵan.

“Búgin – úshinshi kún. Ne oılarymdy da bilmeımin. Júregim tabylady deıdi, júregim typ-tynysh, tabylady degen senimmen aıaqqa turmyz. El-jurt qarap jatyr. Tabylyp qalady degen úmittemin”, – deıdi Aldııardyń anasy Aınur Bekjanova.

Aýyl turǵyndary da balanyń izdestirý jumystaryna atsalysyp júr. Biraq ókinishtisi, bala áli tabylmaı jatyr.

– Bireýler alyp ketti me degen boljam bar, sýǵa túsip ketti me degen boljam bar. Úıdiń mańaıynda shuńqyrda jatyr ma dep izdedik, somen taba almaı jatyrmyz. Buryn aýylymyzdan eshteńe joǵalyp kórgen joq. Malymyz da joǵalyp kórgen joq, tynysh aýyl bolatyn, – deıdi Kóksý aýylynyń turǵyndary Meırash Shamsharova.

Jedel izdestirý toby, aýyl halqy men eriktiler tabandarynan taýsylyp úsh kúnnen beri ár úıdiń aýlasyn, qora-qopsysyn túgel qarap shyqqan. Úıdiń irgesinde aǵyny qatty ózen bar. Senbi kúni balany sol mańnan kórgender de bolǵan eken. Sondyqtan Muqanshy sý aıdynyn súzip shyǵý úshin súńgýirler shaqyrtylǵan eken.

Quzyrly organ ókilderi táýlik boıy tynym tappaı, Aldııardy áli de izdeımiz dep otyr. Al bala úıden shyǵyp ketkende ústine sur jempir, qara shalbar kıgen. Aıaq kıimi aq tústi. Polıııa kishkentaı búldirshindi kórgen-bilgender bolsa, 102 nómirine habarlasýdy suraıdy.

– Izdestirý jumysyna 400-ge jýyq adam qatysty. Shuńqyrlar bar ma, shatyrlar, dárethanalardyń tesikterin bárin túgeldeı úıdiń ishin tekserý jumystaryn júrgizdik. Odan keıin osy aýyldyń jan jaǵyndaǵy jabaıy ósken aǵashtar, jyńǵyl, egistik jerler sonyń bárin izdestirý jumystaryn júrgizdik. Sýdyń ishinde de izdestirý nátıjelerin jalǵastyrýdamyz, – dedi Jetisý oblystyq polıııa departamenti jergilikti polıııa qyzmetiniń bastyǵy Qaısar Muhmetov.