جەتىسۋدا ايەلىن ۇرىپ ولتىرگەن ەر ادام ۇستالدى

جەتىسۋ وبلىسىندا ايەلى ايزات ماراتقىزىنىڭ ولىمىنە كۇدىكتى ەر ادامعا قاتىستى قىلمىستىق ءىس قوزعالدى. وقيعا 21 ماۋسىمنان 22 ماۋسىمعا قاراعان ءتۇنى اقسۋ اۋدانىنىڭ بالاساز اۋىلىندا بولعان, دەپ حابارلايدى Qandastar.kz.

مارقۇمنىڭ اپكەسى راۋشان دارىمبەكوۆانىڭ ايتۋىنشا, ايزات كۇيەۋىنىڭ سوققىسىنان كوز جۇمعان. وقيعادان كەيىن ەر ادام الدىمەن ايەلىن اتا-اناسىنىڭ ۇيىنە اپارىپ, كەيىن مەديتسينالىق كومەك قاجەت بولعان سوڭ جانسۇگىروۆ اۋداندىق اۋرۋحاناسىنا جەتكىزگەن. الايدا, اتالعان اۋرۋحانادا جوندەۋ جۇمىستارى جۇرگىزىلىپ جاتقاندىقتان, ايزات تالدىقورعان قالاسىنا تاسىمالدانعان. دەگەنمەن, مەديتسينالىق قورىتىندىعا سايكەس, ول كەزدە ايەلدىڭ تىرشىلىك بەلگىلەرى بولماعان.

مارقۇمنىڭ تۋىستارى ونىڭ دەنەسى سوت-مەديتسينالىق ساراپتاماسىز ءمايىتحانادان شىعارىلعانىن ايتادى. ولاردىڭ سوزىنشە, ايزاتتىڭ دەنەسىندە كوپتەگەن كوگەرگەن ىزدەر مەن اشىق جارالار بولعان, بۇل – تۇرمىستىق زورلىق-زومبىلىقتىڭ ايعاعى. قايتىس بولعان ايەلدىڭ اپكەسى ءادىل تەرگەۋ جۇرگىزىلىپ, كىنالى ادامنىڭ جازالانۋىن تالاپ ەتەدى. ول سونداي-اق ايزاتتىڭ اتا-اناسى مەن ەكى جاسقا تولماعان كىشكەنتاي قىزى قالعانىن ايتتى.

وبلىستىق پوليتسيا دەپارتامەنتى كۇدىكتىنىڭ ۇستالىپ, ۋاقىتشا ۇستاۋ يزولياتورىنا قامالعانىن, قىلمىستىق ءىستىڭ قوزعالعانىن راستادى. قازىرگى ۋاقىتتا سوتقا دەيىنگى تەرگەۋ جۇرگىزىلۋدە, الايدا ءىستىڭ تولىق ءمان-جايى جاريا ەتىلمەي وتىر.