جەتىسۋدا ءبىلىم سالاسىنىڭ قىزمەتكەرلەرى سوتتالدى

فوتو: اشىق دەرەككوز

جەتىسۋ وبلىسىندا ءبىلىم ءبولىمىنىڭ بۋحگالتەرلەرى قىزمەتكەرلەردىڭ شوتىنا بەلگىلەنگەن جالاقىدان ارتىق اۋدارۋ ارقىلى 1,6 ميلليارد تەڭگە بيۋدجەت قاراجاتىن جىمقىرعان. باس بۋحگالتەر 8 جىلعا سوتتالدى, دەپ حابارلايدى http://qandastar.kz

سىبايلاس جەمقورلىققا قارسى اگەنتتىكتىڭ مالىمەتىنشە, ءبىر توپ قىزمەتكەرلەر لاۋازىمدارىن پايدالانىپ اقشا جىمقىرۋ ءۇشىن ءتۇرلى ءتاسىل قولدانعان.

“قۇرمانعاليەۆا, قالاباەۆا, مۇراتوۆا جانە تاكەن ءبىلىم ءبولىمى قىزمەتكەرلەرىنىڭ شوتتارىنا بەلگىلەنگەن جالاقىدان ارتىق اۋدارۋ جولىمەن 1,6 ميلليارد تەڭگە سوماسىندا بيۋدجەت قاراجاتىن جىمقىرعانى ءۇشىن كىنالى دەپ تانىلدى.

بالعاباەۆا, قالاباەۆا بالاباقشادا اۋديت جۇرگىزبەۋ سىلتاۋىمەن ولاردىڭ اقشالاي قاراجاتىن يەمدەنگەن جاپاباەۆقا پارا بەرۋگە وقتالعانى ءۇشىن كىنالى دەپ تانىلدى.

تالدىقورعان قالالىق سوتى «سارقان اۋدانى بويىنشا ءبىلىم ءبولىمى» مم باس بۋحگالتەرى ك.قۇرمانعاليەۆاعا, سول ءبولىمنىڭ بۋحگالتەرلەرى ا.مۇراتوۆا مەن ا.قالاباەۆاعا, «قازپوشتا» اق اۋداندىق ۋچاسكەسىنىڭ باستىعى ا.تاكەنگە, «ايدانا» بوبەكجاي-باقشاسى مەڭگەرۋشىسىنىڭ م.ا. ن.بالعاباەۆاعا جانە جەتىسۋ وبلىسى ءىماب كامەرالدىق باقىلاۋ ءبولىمىنىڭ باسشىسى ۋ.جاپاباەۆقا قاتىستى ۇكىم شىعاردى”, – دەلىنگەن حابارلامادا.

سوت ۇكىمىمەن قۇرمانعاليەۆاعا 8 جىل, قالاباەۆا, مۇراتوۆا جانە تاكەنگە 7 جىل باس بوستاندىعىنان ايىرۋ جازاسى تاعايىندالدى.

“بالعاباەۆا مەن جاپاباەۆقا تيىسىنشە 1,2 ميلليون تەڭگە جانە 1 ميلليون تەڭگە ايىپپۇل سالىندى. سونىمەن قاتار سوتتالعاندار مەملەكەتتىك قىزمەتتە جانە كۆازيمەملەكەتتىك سەكتور سۋبەكتىلەرىندە ءومىر بويى قىزمەت اتقارۋ قۇقىعىنان ايىرىلدى”, – دەلىنگەن حابارلامادا.