جەتىسۋدا نايزاعاي سالدارىنان مالشى كوز جۇمدى

فوتو: اشىق دەرەككوز

جەتىسۋ وبلىسى ەسكەلدى اۋدانىنىڭ زەرنوسوۆحوز اۋىلىندا جايىلىمدا جۇرگەن ەكى مالشىنىڭ ءبىرىن نايزاعاي ۇرىپ, قايعىلى وقيعا ورىن الدى. ەر ادام سول جەردە كوز جۇمدى. ونىڭ جانىنداعى ەكى جىلقىسى مەن ءيتى دە وقيعا ورنىندا مەرت بولعان, دەپ حابارلايدى qandastar.kz

كۋاگەرلەردىڭ ايتۋىنشا, وقيعا كۇن كۇركىرەپ, جاڭبىر جاۋعان كەزدە بولعان. ەكى جىلقىشى مال ايداپ كەلە جاتقان. كەنەتتەن نايزاعاي اشىق دالاعا ءتۇسىپ, ءبىر جىلقىشىنى, جانۋارلارىمەن بىرگە, ءبىر ساتتە جالماپ كەتكەن.

— ءبارى ءبىر ساتتە بولدى. قاسىنداعى سەرىگى ءسال ارىرەكتە جۇرگەندىكتەن امان قالدى. بىراق قاتتى كۇيزەلىپ ءجۇر. ءالى ەس جيا الماي ءجۇر, — دەيدى اۋىل تۇرعىندارى.

قايتىس بولعان ازاماتتى اۋىلداستارى ەڭبەكقور, سابىرلى ءارى جانى تازا ادام رەتىندە سيپاتتايدى. قازىر بۇكىل اۋىل قارا جامىلىپ وتىر.

— ءبىز كۇندە دالادامىز, كەڭ جايىلىمدا جۇرەمىز. ەشكىم مۇنداي بولادى دەپ ويلامادى. جاي عانا جۇمىسقا شىققان ەدى, ءيتىن, جىلقىلارىن الىپ… ءسويتىپ كوز جۇمدى, — دەپ كۇرسىندى اۋىل اقساقالى.

اۋداندىق اكىمدىك مارقۇمنىڭ وتباسىنا قولداۋ كورسەتىلەتىنىن مالىمدەدى. سونداي-اق, نايزاعاي كەزىندە قاۋىپسىزدىك ەرەجەلەرىن ساقتاۋ بويىنشا ءتۇسىندىرۋ جۇمىستارىن كۇشەيتۋ جوسپارلانىپ وتىر.